Magway (Ma Gui) region, Yaw hnam huam chhung atangin Military council sipaiten Chin State, Mindat lamah an pan mek avangin Mindat – KanGyi-Saw khua main road chu July 13 atang khan an khar thu Mindat PDF-ten an thuchhuahah an tar lang a.
“Military council sipaite Yaw hmun atangin Chin State lamah an rawn pan mek avangin eng lai pawha buaina tawk thei reng kan nih avangin fimkhur thu-ah kawng kan khar phawt a ni” tiin PDF-Mindat thupuangtu Salai Ha Um chuan a sawi a.
July 9 atang pawh khan Military council sipai KyaukThu Battalion te chu Chin State lamah eng lai pawha luh mai thei an nih avangin KyaukThu leh Mindat kawngpui pawh tiam chin awm lovin an khar tawh thu Mindat CDF-ten thu an chhuah tawh a.
“Mindat panna hi kawngpui 2 a awm a, chu kawng chu kan khar vek pawhin harsatna kan la tawng thei tho a ni” tiin Salai Ha Um chuan a sawi a.
Yaw huam chhungah pawh Gangaw District No.13 Battalion-ten Saw leh KyaukThu kawngpuiah mi tu mah veivak lo turin kawng an khar thu July 13 khan thu an chhuah bawk a ni.
KyaukThu Battalion, Military council sipai 80 rualten ralthuam liana an kah a, Yaw khua an chhuahsanin chhim lam an pan mek a, he operation-ah hian Phyusawhti hmeichhia sipai 8 lai an tel thu Yaw Alin Tan-ten an thuchhuahah an tar lang bawk a ni.
