Chin State, Matupi township atanga Mindat township rawn kir leh Military Council Motor 70 rual te chu CDF-Mindat ten April 30 atang khan an kap tan a. Mindat leh Matupi inkar kawng tluanin an inkap nasa a, Military Council lam mi 9 an thi a, hei aia thi an tam zawk rin a ni.
Military Council-te hi April 28 atang khan Matupi township atangin an chhuak tan a, April 30, Mindat township an luh dawn tepah CDF-Mindat hnai zetin an kah chilh bakah Bomb kam hmanga an beih thu CDF-Mindat thupuangtu Salai Haa Um chuan a sawi.
“Motor 73 ruala an kal laiin kan lo kap thut a, tum hmasa berah mi 4 an thi a, mi 3 an hliam. A tum 2-naah chuan mi 5 an thi a, hliam an tam khawp mai. Kan Bomb kam an thlen rualin kan hmet puak leh a, a puak nasa khawp mai, mi eng zat tak thi ang maw, kan hre chiah lo. Kan hriat chinah chuan mi 9 an thi a, mi dang thi pawh an tam ngawt ang”
April 30 khan Mindat leh Matupi inkar Mel ban 71-naa inkahnaah Military Council lam mi 4 an thi a. May 1 pawh khan Mindat leh Matupi inkar mel ban 68-naa inkahnaah Military Council lam thi zat hriat chian a ni lo tiin a sawi zui.May 5-a inkahnaah Military Council lam mi 5 an thi a, CDF-Mindat ten Bomb kam hmanga an beihnaah Military Council lam thi zat hriat chian a ni lova, thi an tam ngawt ang tiin Salai Haa Um chuan a sawi zui.
“Tun tum chauh a ni lo. Tum dangah pawh Mindat ram chhungah an rawn kal chuan ram dinhmun kan hre bawk a, kan lo kap hrep thin. Tunah pawh kan inbuatsaih tha khawp a, a tul angin chhan let an ni ang”
Matupi township atanga chhuak Military Council te chu Mindat leh Matupi inkar mel ban 90,91 velah CDF-Matupi ten an kap a, Military Council lam mi 9 an thi.
Dan pangngaiah chuan Mel 102 vel hi ni khat kal vel a nih laiin Mindat leh Matupi inkara Military Council te kal te chu CDF ten an ka prawn thin avangin ni 10 chuang an thang bakah thi leh hliam an awm nual.
Tun dinhmunah chuan Mindat township velah ruah a tam hle a, chhum pik mup karah Military Council te an che hlei thei lova, Mindat leh Matupi inkar kawng lakah an la tangkhang reng a, an inkap reng thu hriat a ni.
