Mindat Leh Matupi Inkara Inkahnaah Military Council-te Thi Leh Hliam An Awm Nual

0

Chin State chhim lam Mindat township atanga Matupi township-a Military Council-te Ration phur Motor kal lai chu March ni 26 atang khan CDF-Mindat-te nen an la inkap ni tin a. He inkahnaah hian Military Council lam thi leh hliam an awm nual tih hriat a ni.

Mindat leh Matupi kawnga Tank 2 leh Military Council mi 80 rual kal te chu March ni 29 khan CDF-Mindat ten Bomb kam hmanga an beihna Video tar lan a ni a.

He Bomb kam chak tak hi a puak nasa thei hle a, Military Council te thi leh hliam eng zat nge an awm tih hriat a nih loh thu CDF-Mindat thupuangtu chuan a sawi.

“March ni 29 khan Mindat leh Matupi kawng inkar, Tlang karah velah Video-a kan hmuh angin inralsai thawm hriat leh hmuh a ni a, thi leh hliam an awm nual ka ring a ni” tiin CDF-Mindat thupuangtu chuan a sawi.

Mindat township-ah hian March ni 25 atang khan Military Council-te leh CDF-Mindat te vawi duai lo kan inkap a. Vawiin thleng hian Mindat leh Matupi inkar Mel ban 70-na velah an la tangkhang thu a sawi zui bawk.

Mindat leh Matupi khaw inkar hi mel 102 zeta hla a ni a. Mindat atanga chhuak Military Council te chu Matupi-a Battalion 304 ten an va hmuahna lamah March ni 31 leh April ni 2 khan Mindat leh Matupi inkar Chainpan khaw bulah CDF-Matupi te nen an inkap a. Military Council lam mi 25 an thih thu CDF-Matupi Information Director chuan a sawi.

“Kyauhtuh atanga Matupi pan mek Military Council Motor-te chu Matupi base, Battation 304 ten hmuh tuma an kal lai kawng chanve an thlen vel tiah CDF-Matupi ten an lo kap a. Military Council lam mi 25 vel an thi nia hriat a ni a, mi 20 aia tlem lo an hliam”

March ni 31 khan Matupi township, Chaingpan khaw thar leh khaw hluia inkahnaah khan Military Council lam mi 16 an thi a. April ni 2-ah pawh khan Sipai Officer 1 tiamin Military Council lam mi 9 an thih thu a sawi zui bawk.

He inkahnaah hian CDF-Matupi lam sipai mi 2 an boral thu hriat a ni.

Hetiang vek hian Chin State, chhim lam Paletwa township Sami khaw luh dawna Military Council-te Camp chu CDF-Paletwa leh CNA tangkawp ten zan hmasa dar 8:30 velah an kah rawn a, Military Council lam mi 6 an thih thu CDF-Paletwa ten an thuchhuahah an tar lang.

Share.

Leave A Reply

Exit mobile version