Chin state chhim lam, Mindat township-a Chinland Defense Force (mindat) control area hmun pakhatah sipai battalion clinic leh library hawn theih a nih thu Eagle Battalion (1) CDF-Mindat chuan May ni 10-ah thuchhuah an siam a ni.
Fur ruah tui a tlak tan tawh avangin, inkalpawhna lamah harsatna a awm tan a, mipui lam an dam loh hunah a rang thei ang bera inenkawlna a awm theih nana ruahman a ni a. Damdawi man a to hlawm em avangin, kimchang taka dah theih a ni lo a, emergency atan chauha damdawite chu dah a nih thu Eagle battalion 1 thuneitu pakhatin a sawi.
Ani chuan, “A bikin fur kan rawn thleng ang a, kawng lakah harsatna a rawn awm chho dawn a, chutah mipui lam dam lohna leh intih palh thilah emergency-a lo enkawl theih kan beisei a ni. Library pawh kan sipaite an hunawl neih huna lehkha an chhiar tam theih nan leh mipui lam pawhin a thlawna an chhiar theih nana ruahman a ni,” tiin a sawi.
Chu clinic-a damdawi leina pawisa thawhtute leh lehkhabu leina pawisa thawhtu zawng zawngte chunga an lawmthu leh tuna hmalak chhunzawm zel turah pawh thawmlawm chu Eagle battalion 1-Mindat CDF page atanga thawh theih a nih thu tarlang a ni a.
Battalion 1 Mindat-CDF thuneitu pakhat chuan, “Fur kan thleng hnai tawh a, thingtlang khaw lamah inkalpawhna a harsa thei dawn a, damlo an tam chho dawn a, damdawi avang chho zel dawn bawk a, chung atana thawhlawm thawhtute zawng zawng chungah kan lawm tak zet a ni,” tiin a sawi.
