Mindat township chhungah military council-in jet fighter hmangin bomb a thlak a, civil mi 2 an thih thu hriat a ni

0

Chin state Mindat township, Chhat khua leh Sun-Taung khaw 2 chu military council sipaiten jet fighter 2 hmangin, July ni 2 chawhma lam dar 11 pelhah bomb thlakin an bei a, civil mi 2 thiin, hliam an awm thu hriat a ni.

Miliatary council sipaiten jet fighter hmangin, Chhat khuaa zirna in leh biak in compound-ah bomb an thlak a, civil mi 2 an thih thu CDF-Mindat thupuangtu Ko Yaw Man-an a sawi.

Ani chuan, “Chhat khua leh Sun-Taung khuaah bomb an thlak a, tukin chawhma lam dar 11 pelhah jet fighter 2 hmangin a ni. Jet fighter rawng pawl pahnih chuan bomb a thlak a, Chhat khua school-ah a tla a, biak inah a tla bawk a, school leh biak in bula awm civil 2 an thi a, 2 an hliam na hle a, mi dang hliam pawh an awm thu hriat a ni,” tiin a sawi.

Military council sipaiten jet fighter hmanga an beih hmain chu khaw chungah a thlawk kualin an enkual hmasa phawt a, mipui chu tum nei ranin a bei a ni tiin CDF-Mindat chuan thuchhuah an siam a.

Inkah tawhna awm lova chutianga zirna in, biak in chunga bomb thlak chu kan dem hle a ni tiin Salai Yaw Man chuan heti hian a sawi leh bawk a.

“Mipui pawisawi lo te an bomb a, an bomb-na hmun lah chu school, biak in, bomb lohna tur zawk a ni a, mahse an thlak tho a, inkap pawh an ni lova, ralthuam kengho awmna pawh a ni lo. Ralthuam keng lote, inkahna hmun ni lova bomb an thlak bakah biak in, school bomb chu a huat thlala em a, keini chuan military council hi sawi ngaihna pawh a awm tawh lo a ni,” tiin a sawi.

Military council sipaiten jet fighter atanga an bomb Chhat leh Sun Taung khua chu Mindat khua atanga mel 40 vela hla a ni a, khaw chhung mite chu hlau leh thlabar takin ramhnuai lamah an tlan lut tih hriat a ni a.

June ni 29-ah pawh Mindat khaw chhunga inkulh IB 274 battalion sipaiten inkahna awm lovin, Mindat khaw bula awm khuate chu laipuiin an kap a, kum 14 mi tleirawl a thih bakah, June ni 16-ah pawh Hmuitui khaw mi 3 te chu laipuia kah hlum an ni bawk.

Share.

Leave A Reply

Exit mobile version