Chin State Mindat township-ah kum 16-35 thalaite CDF-Mindat phalna hmu lovin hmun ram chhung leh pawnah kal chhuah an phal loh thu CDF-Mindat-ten June 18 khan an thuchhuahah an tar lang a.
CDF-Mindat-ten eng vangin nge an thalai rualte phalna hmu lova ram chhung leh pawn chhuah an phal loh, Tuna CDF-Mindat te dinhmun leh a chhehvel te chu Mindat township Public Administration thupuangtu Salai Yaw Man, Khonumthung Media-in a biangbiakna I lo tar lang ang u.
Zawhna: A hmasa berin tuna Chin State chhim lam Mindat township buaina chungchang tlem min hrilh thei ang em?
Chhanna: Chhim lam zar kan sawi dawn chuan kan hnung deuh khan Matupi lamah buaina a awm zawk a, an kir leh tawh a, Mindat-ah chuan inkah buaina a awm hran lova, May leh June thla chhung khan rawlralin vawi 10 zet kan kap a. Tunah rih chuan Military council sipaiten Pauk khua atangin KyaukThu (Chauh Thuh) khaw lamah pawl 3-a in thenin Motor 10-in an pan mek a, June 22 khan KyaukThu an la thleng lo, boruak a so sang zel mai thei. Mindat-ah hian June 17,19-a inbeihnaah PDF sipai pakhat na vak lo a hliam a, Military council sipai 2 an thi nia rin a ni a. Ni chhuakna lama inbeihnaah thi leh hliam erawh kan hre chiang thei lo.
Zawhna: CDF-Mindat-ten Mindat township inthunun theih dan min hrilh thei ang em?
Chhanna: Military council sipaite hian Mindat khawpuia Ward 4-ah eng mah an ti thei lova. Khawpui chhungah thalai rualten kawng hrang hrangin an lo bei zel a, May leh June thla chhung khan vawi 15 vel an bei a, chuvangin Military council sipaiten khawchhung an thunun thei lo ang tluk a ni.
Hemi chungchang hi kan chhunzawm leh dawn nia.
