Sagaing region, Minmu township Letthoktaw khuaah May 6 khan Military council sipaiten an luh chilh avangin khawchhung In 500 chuang an hal chhia a, mi pakhat a boral thu tualchhung miten an sawi a.
An hal hlum tak hi kum 40 mi Ko Aung Soe a ni a, tun hma chuan In 600 chuang awm Letthoktaw khua hi tunah chuan In 80 vel chauh a awm tawh thu hriat a ni bawk.
May 6 zing dar 8:00 vel khan Letthoktaw khua atanga mel khat vela hlaah PDF te leh Military council sipaite inbeihnaah Military council sipaiten a khawpum deuhthaw chenna in an hal thu tualchhung hming thup pakhat chuan RFA Media hnenah heti hian a sawi a.
“Mel khat vela hla atangin an inkap nasa hle a, khawchhung an luh chilh a, khawchhung zawng zawng deuhthaw an hal kual vek” tiin a sawi.
Military council sipaiten khawchhung an hal laiin tualchhung mite an sawisak bakah phone an laksak nual tiin tualchhung miten an sawi a, RFA Media erawh chuan a la nemnghet chiah rih lo.
Military council sipaiten khawchhung In an hal nual hnuin chawhnu dar 2:00 velah khawchhung an chhuahsan thu tualchhung miten an sawi a.
Military council sipaiten Letthoktaw khuaa In an hal chhiat chungchangah Sagaing region Military council thupuangtu RFA Media ten phone-a an zawhnaah chhanna a awm rih lo a ni.
Military council thupuangtu General Zaw Min Tun chuan keini Military council sipaite hian tualchhunga mipuite chenna in hi vawi khat mah kan hal chhe ngai lo tiin a lo sawi tawh thin a ni.
Data for Myanmar ten kum 2023 March 19 thlenga an chhinchhiah dan chuan Military council-ten thuneihna an lak hnu atangin kumin 2023 February 23 thleng khan Sagaing region-ah chenna in 47778 an hal chhiat tawh thu an tar lang bawk a ni.
