Myanmar ram chhungah mipui invenna revolution fight back chu a thawk na chho zel a, thla khat chhung, thla hmasa February khan military council sipai 2095 vel an thih thu National Unity Government (NUG) chuan thuchhuah a siam a.
Tuna thuchhuah hi NUG sorkarin emergency a chhuah, Februray ni 7 atanga March ni 6 inkara list lak khawm a ni a, firfiak sipai hliam zat chu 637 niin a tarlang bawk a ni.
Thuneihna latu sipai pawlin mipui chunga lal hrawt leh pawisak nei lova an khawsa chu mipui lam pawhin mahni dam khaw chhuah nana lo invengin, Peoples Defensive War chu kal pui mek a ni a.
Myanmar ram pumah Myanmar khua leh tuiten sipai thuneihna chu Myanmar ram chhung atanga nuai bo a, Federal Democracy tun din tumin mipui lungawi lohna lantirna chu state leh region hmun hrang hrangah a taka lantir a ni a.
Chutih rualin NUG sorkar pawhin mipui lama hawi kir tura sorkar hna thawkte CDM zawm tura a sawmna chu sipai leh police thenkhatin chhang letin mipui lama tang a ni telin an tam chho zel a.
Region leh State levela inkahna chhuah dan dinhmun erawh thlakhat chhungin, Kayin state-ah vawi 227, Sagaing region-ah 112, Mandalay region-ah 37, Karenni state-ah 27 te niin, chung hmunah chuan inkahna a chhuak tam ber thu NUG-in an tarlang tel bawk a ni.
