National Unity Government (NUG) sorkar thlawptu ven him leh kawl sipaite thiltih dodal tura pawl ding, People’s Defense Force (PDF) hi May 5 khan NUG hnuaiah official-a din a ni.
NUG thuchhuah pakhatin a tar lan dainin, PDF hi Federal Union Army din chhuah nana hmalak tanna hmahruai pakhat a nih thu tar langin, kum 70 chuang liam taa tualchhung buaina tihrem leh ralmuanna lam sawi danglamna kawnga a mawhphurtu an nih thu an tarlang bawk a ni. Hemi chungchangah NUG, Deputy Defense Minister Daw Khin Mah Mah Myo chuan RFA zawhna changin “PDF hi May 5 khan kan din a, he pawl din tur hian hun eng emaw ti atang khan ruahmanna kan lo siam tawh a ni. Hun tam tak pawh kan pe a ni” a ti. PDF hi NUG tana ralthuam keng pawl pakhat anga kalpui an tum thu Deputy Minister hian a sawi lang bawk a ni.
NUG hi April 16 khan NLD Hluttaw (Parliament) palai telin CRPH kaihhruaina hnuaia din niin, State Administrative Council (SAC)
kaihhruai sipaite hmalakna dodal hi a tum ber a ni. NUG thil tum thenkhatte chu NUG hi khawvel mipuiin a hriatpui pawl pakhat nih te, Democracy dinchhuah lehna tura hmalak te, Tatmadaw sipai hi Myanmar politic thila pai chhuah bakah Federal Democracy Union dinna tura theihtawp chhuahte a ni. NUG kahhruaina hnuaia din Federal Union Army-in a tum chu Myanma Tatmadaw bei let tur leh tlangmi (Ethnic) sipai pawlte hmun khata luan zatir hi a ni.
Hun rei tak atanga zalenna sualtu ramri hrula awm tlangmi (Ethnic) sipai pawlte leh Tatmadaw inkara innghirnghona leh buaina awm thin hi tun dinhmunah sipai thuneihna hnuaia a awm leh tak avangin, buaina pawh a thleng san chhoh zel rin a ni.
Tunah hian Myanmar sipaite thiltih avanga raltlan mipui tam tak chu KNU leh Ethnic sipai pawl thenkhatin an thuneih chin ram chinah an lo enkawl mek a, ralrel dan zirtirna pawh an pe nghal a ni. Hetih lai hian Myanmar sipaite beih tawk mipui thenkhat chuan Mipui Sipai Pawl an din a, Myanmar sipaite an bei let mek bawk a, nasa zawkin an bei let zel dawn a ni. Hetih rual hian tualchhunga sipai duh lohna lantirna pawh kalpui zel bawk se, khawvelin official takin min hriatpui dawn tihna ¬a ni.
Thil pakhat awm chu Myanma Tatmadaw hi ASEAN-a ralthuam keng sipai zinga sipai pawl lian ber zing a mi a ni a, a thiltih theih pawh hi Ethnic sipai pawl zawng zawng aiin a let tam takin an lian a ni. An chhut danin, tun dinhmunah Myanmar sipai 350,000 vel an awm a, Ethnic sipai hi 75,000 leh 78,000 inkar vel chauh an ni.
Amaherawh chu, Ethnic sipaite hi ramri hrulah thawhhona an nei chho mek a, tangruala an bei thei a nih chuan Myanmar sipai pawl hi a then darh vek thei a ni. Federal Union Army pawl din tak tak hma leh Myanmar sipaite do let tura tanrualna leh thawhhona a awm loh chuan PDF hian hun rei tak a awh thei a ni. Tun dinhmunah mipuite hi eng chen nge thawhhona leh tangrualna a awm dawn tih hi hriat a la ni lo a ni. A chhan chu pawl tinin an tum te, a duh dan leh ram pawn nena an
lo indawr tawh danah inan lohna tam tak a awm thei bawk a ni.
Tunah rih chuan KIA leh KNU pawl ten NUG kaihhruaina an la thlawp zel a, hetih lai hian RCSS chuan NUG a thlawp thu sawi chamchi mah se, a sawi angin a la kal tak tak thei lo a ni. Chutiang bawkin, AA leh sipai pawl thenkhatin NUG leh NLD sorkar chungah rinna an la nghat tak tak thei lo bawk.
NUG thuchhuahin a tarlan danin, United Nation Security Council (UNSC)–in Myanmar-a ralthuam hralh chhuah khap turin ram 200 chuang a ngen a, hei hi Myanmar sipai ten dimdawina tel loa mihring nunna an lak avang te, naupang kum tling lovin an nunna an chanphah avang te, pawisawi lo mipui 769 chuangin nunna an chan tawh thu te sawiin, tun dinhmunah eng sorkar mahin Myanmar sipaite hnenah silai mu pakhat pawh zuar chhuak lo turin UNSC chuan a tar lang a ni.
