Mipui Sum Ru-a Ralthuama Sumdawng Hausa Sipai Hotute

0

Myanmar firfiak sipaite tana ralthuam lakluhna kawng emaw lo commission hna thawktute chu Sipai leh an vua leh vangte an nih loh vek pawhin, a lamna hnai takte an ni tlang pui a.

Tun hnaia Reuter chanchin pakhatah chuan Air-force hotu lu ber Major General Maung Maung Kyaw-a fapa Irvin Htet telin an chhungkua chu a ruka ralthuama sumdawnna (smuggling) lamah an tel thuk hle tih a tarlang a.

Major General Maung Maung Kyaw hi kum 2018 khan Commander in Chief (Air) nihna chelhin air force lam tihchangkanna policy duangin, US Dollar maktaduai tam tak a hmang a. A fapa Irvin Htet leh a nupuite pawn thlawhna lam bungrua (part) chi kim, drone, radar ang chi zawng zawng hralh chhuah hna thawkin, Alliance Engineering Service tih company an din a ni.

Kum 2019 atana Myanmar Air force budget chu US dollar maktaduai 360 a ni a. Kum 2020-ah chuan US dollar maktaduai 337-ah a kai chho leh a, chung zinga thlawhna part leh siam thatna (maintenance) senso-na kalral chu, he budget hmun thuma thena hmun khat ang vel a ni bawk a. Reuter chanchin chuan Major General Maung Maung Kyaw te chhungin sipai ralthuam leinaah commission man an lak dan chu zaa 20% atanga zaa 30% thleng a nih thu a tarlang bawk a ni.

Myanmar sipaite hian Ukraine ram atangin ralthuam an lei tam hle a. Ukraine ram atanga ralthuam leitu ber chu sipai chhungkaw zinga mi Aung Hlai Oo a ni a. Ani chu Ukraine leh Myanmar ram tana palai pawimawh (honorary Consul) anga ruat a nih thu Justice for Myanmar (JFM) chuan a tarlang a.

Aung Hlai Oo chu Myanmar Chemical & Machinery (MCM) Company hotu a nih rualin, sipai nena inzawmna nei a nih bakah Ukraine atanga ralthuam a lak luh atangin commission zaa 20% atanga 30% thlengin a la thin tih hriat a ni a. JFM chuan ‘hei hi Aung Hlai Oo leh Ukraine sorkar tana hlawkna nasa tak a ni’ tiin a tarlang.

Justice For Myanmar-in a dawn, Myanmar Minister of Defense lehkha put ru-ah chuan sipaiin kum 2016-2017 inkara a lei Ukraine siam chhuah Mil Mi-2 leh Mil Mi-17 chi Helicopter part te, BTR-3U sipai Tank part te, lawng engine te, Lawng lian nawr kaltu leh control-na system te leina kawngah Aung Hlai Oo-a Singapore based MCM Pacific Pte. Ltd a lo inrawlh thuk dan kimchang a chuang a.

Chutah chuan, Myanmar Chemical & Machinery Co. Ltd hian T-72 indona Tank, khawl part hrang hrang sipaite tan a leisak tih pawh tarlan a ni. He MCM company hian Ukraine bakah Serbia ram ralthuam te pawh firfiak sipaite tan a lo leisak bawk a. Chu mai ni lovin, MCM company hian Myanmar sipaite tana motor lian (truck) siam chhuahsaktu China Truck company pakhat Sinotruck company chu a partner company a nih thu a website-ah a tarlang a ni.

Sipaiin thuneihna an lak hnua anmahni dodaltu kawngzawhte an hnawh darknaah Sinotruck hi hmun tinah hmuh tur a awm a. Business community lam chuan MCM company hi Meikthila-a Miltruck trade mark, Sinotruck sipai motor siamna lamah pawh a inrawlh bawk niin an sawi a.

Myanmar-a ralthuam lama sumdawng company dang leh chu Myanmar Consultancy Company a ni a. He company pawh hian Ukrspecexport leh Lutsk Repair Plant “Motor” te hnen atangin MiG-29 model indo thlawhna (jet-fighter) part te, radar part te, IGLA-1M model, lei lam atanga van lama rocket kah dan zirna khawl leh RD-33 Turbo Jet engine te chu dawngin a hralh ngei tih Justice for Myanmar chuan a tarlang leh a.

Myanmar Consultancy company hi Yangon-a, Yatanarpon Aviation Support Company nen address leh phone number inanga register a nih angin, thu hmun an nih a rinawm a. Yatanarpon Aviation Support company chu tun hma sipai sorkar laia Forest Minister Aung Phone-a fapa Sit Tai Aung-a enkawl a ni a. Sit Tai Aung chuan company dang Suntac pawh a nei a, mahse sipai lam nena a inkaihnawih avangin, European Union lamin an hrek mek a. Sipai sorkar chuan Sit Tai Aung hi Mexico ram leh Myanmar ram palai tan an ruat a; ni kum 2020 khan sipai tan Ukroboronservice company atangin thlawhna khawl part chi hrang hrang leisakin hlawkna namen lo a tel tih hriat a ni.

Reuter news chuan, “Firfiak sipaiten ethnic hmuna indo thlawhna hmanga bomb thlak a, an sapa tal laiin, sipai hotute chhungkua chu London, Singapore leh Bangkok ang chi khawpuiah an bazar kual vel mai mai thin,” tiin a tarlang.

Chung ralthuam atanga sipai vua leh vangten hlawkna US dollar maktaduai tam tak an tel mai bakah Myanmar ram chhung atanga chhuak tuialhthei, natural gas leh lunghlu (jake) telin leilung hauhsakna zawng zawng chu kum engemaw zat an thuhnuaiah dahin, an tu chhuan engemaw zat ei sen loh an nei bawk a.

Firfiak sipaite ralthuam lei dan chungchang, zirchiangtu pakhat chuan, “Sipai hian mipui sum chu kawng hrang hrangin ru chhuak mah se, chung sum luan luhna hnar mipuite chu hmelma anga enin a la that reng a. Chung an ruk chhuah sumte chu dan chah theih a nih chuan Myanmar economy chu rei loteah a invawrh chho dawrh ang a, retheihna ata kar lovah talchhuah theih a ni ang. Chuvangin, thiam loh chang sa sipaite leh an chhungte, an vua leh vang zawng zawngin kum tam tak thisen dawta lal an lo hrawt tawhna chu tihtawp a hun tawh niin ka hria,” tiin a sawi.

Share.

Leave A Reply

Exit mobile version