India, Mizoram, Siaha khuaa cheng mek Myanmar raltlan naupangte tan Myanmar Refugee Committee, Siaha (MRCS)-ten May 19, chawhnu khan NUG hriatpuinain raltlante tan zirna school hawn a nih thu hriat a ni a.
School hawnna hi May 19, chawhnu dar 3 khan Siaha YMA Hall-ah buatsaih a ni a, he function-ah hian Myanmar raltlan naupangte leh nu leh pate bakah mi pawimawhte telin mi 250 chuang an kal khawm thu hriat a ni a.
School hawnna inkhawmah hian Chin State PM hlui Daw Ni Sui Lian chuan a hawnna ribbon a chep chat a.
A hawnna inkhawm an hman zawh hian Siaha khuaa Myanmar raltlan zirlai mi 192 te hming an ziak lut nghal a, May 22 atangin Myanmar tex book kalphung mila zirtir an nih nghal dawn thu Siaha-a Myanmar raltlan school-a an Head mawhphurhna chelh mek Dr. Peng Hmung Ling chuan a sawi a.
Tuna an zirna school hmanna tur hi Diamond Private School a ni a, tualchhungten sorkar zirna school an zir zawh hnuah chawhnu dar 3 atangin Myanmar raltlan zirlai naupangten an zir chhunzawm nghal dawn thu an Head chuan a sawi bawk a ni.
