India, Mizoram State, sorkar chuan August 3 atangin Myanmar atanga raltlante chanchin kimchang leh an biometric data chipchiar taka chhinchhiahna a kalpui dawn thu hriat a ni a.
Ministry of Home Affairs in a thupek angin Mizoram leh Manipur state-ah te Myanmar atanga raltlan lo lut te chu an chanchin kimchang taka la khawm a, an lo kalna te leh an kut zia, an mit note thlalak te leh an nihna kimchang taka lak khawm tur a ni a, Mizoram Home Department a Joint Secretary-cum OSD Home Dept Pu David H. Lalthangliana chuan sorkar laipuiin Myanmar raltlan te atanga an chanchin lakkhawm dan tur a buatsaih chu tihdanglam a ngaih avangin kalpui lawk theih a ni lo a ti a, District tinah DC te kaihhruainain kalpui tur a ni tih a sawi a.
Hetihlai hian Hnahthial District thuneitute chuan a hmaa Aizawl-a master training nei lo Hnahthial district lama thawktute chu Thawhlehni khan online-a data lakkhawm dan zirtirna pek an nih thu leh, August 1, khan offline-a chanchin kimchang leh biometric data lakkhawm dan tur zirtirna pek an nih thu an sawi a, August 3 atang hian kalpui tan ngei an tum tih an sawi a.
Hemi chungchangah hian Joint Secretary (Foreigners), MHA Anil Malik-hoa sawi ho niin a format chu Myanmar raltlante chanchin lakkhawm dan tura mila siam danglam turin an ti a, Joint Secretary (Foreigners) ho hian DC leh SP te nen training neih a ni tawh bawk a ni.
Pu David H. Lalthangliana chuan National Crime Records Bureau (NCRB) leh National Informatics Centre (NIC) rawtnate chu pawmpuina nghah a nih avangin duh anga chakin kalpui theih a ni lo a ti a, Technical lama harsatna a awm avangin September thla tawp hun tiam chhunga zawh chu a harsat a rin thu a sawi bawk.
Home department hotute sawi danin Myanmar raltlan Mizorama awm zawng zawngte chu temporary identity card pek chhuah vek an nih tawh thu an sawi a, tun dinhmunah Myanmar atanga raltlan 35000 vel an awm nia chhutin Myanmar atanga raltlante chu dan loa pem lut an nih loh thu an sawi a, an tualchhung buaina avanga sa himna zawnga lo lut an ni tiin Zo hnahthlak unaute an ni tih an sawi bawk a ni.
