India ram Mizoram state-a raltlan, Myanmar refugee naupang 2500 chuang chu lehkha zirtir an nih thu Mizoram state sorkar Education Pu Lalchhandama Ralte-in heti hian a sawi.
“Thenawm ram Myanmar ram chhung buaina avangin, Mizoram state chhunga raltlan chu an tam tawh hle a. Chung zingah lehkha zir rual tam tak an tel a. Education chu Universal a nih angin, India ram danah ram dang mi pawh ni se, keini chuan chhungkhat unaute kan ni tih ngaihdan kan nei a. Chuvangin, lehkha zir thei turin kan ngaihtuah a. Tuna raltlan mi 2526 te chu Mizoramah lehkha an zir mek a ni.”
Myanmar ramah February ni 1-ah sipaiin thuneihna a la a, chu mi hnuah military council sipaite leh mipui venghimtu pawlte inkarah inkahna nasa tak chhuahna Chin state leh Sagaing region lama mipuite chu Chin state nena inramri Mizoram state lamah an raltlan a.
Tunah Mizoram sorkar chhinchhiah danin Mizoram state-ah Myanmar raltlan 24289 an awm tawh a, Mizoram district 11-a refugee camp-ah a tam zawk an awm a, thenkaht chu mahni chhungte leh thiante hnenah an khawsa mek tih hriat a nih rualin Mizoram sorkarin Myanmar refugee-te chhawmdawl nan Rupee cheng nuai 380 vel a hmanral tawh thu pawh hriat a ni.
