India, Mizoram State-a awm Myanmar raltlante ‘biometric’ leh an chanchin kimchang lak khawm hna chu August 3 khan ţan hman a ni lova, August 4 aţang khan hmalak ţan a nih thu hriat a ni a.
Home department hotute hnen aţanga thu dawn danin Hnahthial district official-te an inpeih chian hman loh avangin Myanmar raltlante chanchin kimchang leh ‘biometric’ data lak khawm hna hi August 4 aţangin thawh ţan a ni a.
Ministry of Home Affairs-in a thupek angin Mizoram leh Manipur state-ah te Myanmar atanga raltlan lo lut te chu an chanchin kimchang taka la khawm a, an lo kalna te leh an kut zia, an mit naute thlalak te leh an nihna kimchang taka lak khawm tur a ni a. Sorkar laipuiin Myanmar raltlan te atanga an chanchin lak khawm dan tur a buatsaih dan chu tihdanglam a ngaih avangin kalpui lawk theih a ni lo a. August 4 aţang khan District tinah bawrhsapte kaihhruaina hnuaiah kalpui ţan a nih thu hriat a ni.
Myanmar raltlan, Mizorama awm zawng zawngte chu an chanchinte chhinchhiah bakah temporary identity card pek chhuah vek an nih tawh thu home department hotute chuan an sawi a. Tun dinhmunah hian Myanmar atanga raltlan mi 35,000 vel an awm nia chhutin Myanmar atanga raltlante chu dan lo a, pem lut an nih loh thu an sawi a, an tualchhung buaina avanga sa himna zawnga lo lut te an ni a, Zofate deuh vek an ni tih an sawi bawk a ni.
