Chin Association of Maryland chuan thuchhuah siamin June 27 hian Open Society Foundation chuan US Washington DC-ah thut khawm an nei dawn a, he hunah hian Mizoram-a Chin refugee te chungchang, raltlan te tanpui dan tur leh Mizoram tualchhung miten an lo mikhual dan tur te an sawiho dawn a.
Chin Association of Maryland hian Mizorama an zin report hi US State Department-ah an theh lut a. March 10-23, 2023 khan CAM Board Chairman Reverend Tim Siemens, Advisor Matthew Wilch leh Executive Director Zo Tum Hmung te chu New Delhi leh India state pakhat Mizoram-a Myanmar atanga Chin leh refugee dang te dinhmun an rawn zir chiang a. Heng raltlante hian chhawmdawlna an mamawhzia an report-ah an tar lang a.
Matthew Wilch chuan, “Kan thil hmuh chhuah chu Mizoram State sorkar, NGO leh Kohhranten Myanmar atanga Chin refugee te hi tha takin an lo dawngsawng a ni,” a ti a, CAM Advisor chuan a report-ah hian, “Refugee te hi tualchhung mi te hian lo dawngsang tha hle mah se, khawvel hmun dang atangin tanpuina an mamawh tak zet a ni,” tiin a tar lang bawk a ni.
“Refugees te hian ven himna leh tanpuina an mamawh hle a. Mizoram-a UN agencies awm, UNHCR, UNICEF, WPF leh UN agencies dang te pawh hian hma an lak a ngai a ni, ” tiin CAM Executive Director Zo Tum Hmung chuan a sawi a. “A lehlamah chuan, Myanmar tualchhung Chin State atanga a thenawm Sagaing leh Magway region-a awmhmun an sawnsak te leh India-Myanmar ramri-a awm te pawh hian ven himna leh tanpuina an mamawh hle a ni,” a ti bawk.
Tuna an report pek hi February 1, 2021-a Myanmar sipai rorelna hnuaia an awm hnua a vawi lina a ni a. CAM chuan Open Society Foundation-ten he sawihona an thleng tur chu lawmawm an tih thu an sawi bawk.
