Mizoram state-a raltlan Myanmar Member of Parliament (MP) te leh an chhungte, R. Dengthuama Indoor Stadium, Muala chengte zinga Covid-19 hri kai mi 34 chu an positive thu hriat a ni.
R.Dengthuama Hall, Mualpuia Myanmar MP-te leh an chhungte mi 54 awmah mi 34 chu Covid-19 positive an nih thu NGO United for Democratic Myanmar pawl President Pu Lawma chuan a sawi a.
Ani chuan, “October ni 12 zing lam khan R. Dengthuama Hall-a awm naupang pakhat chu Covid hri a kai tih hmuh tan a ni a. Chu mi hnuah veng chhung upate nen inrawnin vawiin tlai lamah an vaia test an ni a. Chutah chuan mi 33 chu an lo positive tih hmuh a ni,” tiin a sawi.
R.Dengthuama Hall-ah hian Mizoram state chhunga rawn tlan lut, Myanmar MP te leh an chhungte khawsak theih nan state sorkar chuan ruahmanna a siamsak a, tunah hian MP 19 awm mekin, hlauhthawnawm dinhmuna an awm loh Pu Lawma chuan a sawi bawk a ni.
“MP 19 an awm a. Covid hri kai MP zat chiah chu hriat chian a ni lo a. A tam zawkin an kai ngei tih chu kan hria. Hritlang, khuh leh khawsikin an awm a, hlauhthawnawm lutuk a ni lo,” tiin.
NGO United for Democratic Myanmar pawl chuan veng chhung thuneitute rawnin an mamawh inenkawlna tur damdawite an ruahmansak vek a.
Chutiang bawkin, September ni 25 pawh khan Mizoram chhunga ratlan, Aizawl khawpui Sihphir veng, Synod Revival Camping Centre-a awm Myanmar raltlan CDM lut chhungkaw 56 ten Covid an kai thu hriat a ni.
