India, Mizoram chhim lam Siaha khawchhunga Myanmar raltlante chanchin kimchang (Bio Data) chu pawl hrang hrang leh tualchhung thuneitu tangrualten an lak mek thu hriat a ni a.
Siaha khuaah hian chawlhkar kal ta atang khan tualchhung insuih khawm pawl Mara Thyutlia Py (MTP)-ten Myanmar raltlante chanchin kimchang Bio Data la turin Veng hrang hrangah an hriattir tawh hnuin hetia hmalak a nih tan thu Siaha khuaa raltlan mi pakhat chuan a sawi a ni.
“Chawlhkar liam ta atang khan MTP-ten loudspeaker-in mahni chanchin kimchang report theuh turin Veng tinah an tlangau a. A hnuah Veng tinah an la chhunzawm zel a, in report lote chu harsatna an tawh palh chuan mawhphurhna kan la lo vang” tih angin Siaha khuaa raltlan pakhat chuan a sawi bawk a ni.
Myanmar raltlanten MTP office-ah mahni chanchin, hming, nu leh pa hming, awmna hmun, kutzungpui nem, mit no te thlalak leh mahni thlalak an pek theuh thu hriat a ni a, hetia an tih avangin raltlanten an ngaih a that loh thu an sawi bawk a ni.
Hetia chanchin kimchang an lak thu-ah Siaha khuaa MTP President Pakhaw Choza zawhna chhangin India Home Affairs Ministry-in ti tura mawhphurhna a pek thu leh eng vanga hma la nge, a hriat loh thu a sawi a.
“India Home Affairs Ministry chuan biometric mapping siam tur a ni a, keimahni thua ti kan ni lova, kan hnena raltlan awm zat hriat an duh vang a ni ang, raltlan tan hlauhthawn tur a awm lovang” tiin a sawi a ni.
Hetia Bio Data lak tur chungchang hi Mizoram pum puiah hma lak tum nia hriat a ni a, khaw dangah hma an la lak rih loh thu hriat a ni bawk.
Myanmar Military council te leh a thawhpui hnai tak India sorkar hian Myanmar raltlante Bio Data a lak chungchangah hian boruak a awm deuh nia hriat a ni bawk.
