Myanmar ram buai avanga Mizorama raltlan zawng zawng te an nunphung harsatna te chu Mizoram sorkar hian kan chhawmdawl zel dawn’ tiin CM Pu Zoramthanga chuan a sawi.
Tunlaia Mizoram State, Assembly Session neih mekah eptu Party INC, MLA Lalrindika Ralte-a zawhna chu Mizoram CM chuan heti hian a chhang a.
‘Raltlante tan hian eng harsatna mah a awm lo ang a, ngaihtuah tur an awm lo. Kan theih tawkin kan chhawmdawl zel ang a, ei leh in chungchangah leh thil dangah pawh a tul angin kan ngaihtuah zel ang. India Central rorelnaah pawh kan thlen tawh a, min tanpui ngei pawh kan beisei a ni’ tiin Pu Zoramthanga chuan a sawi.
Mizorama raltlante hi ni tinin an pung zel a, a bik takin Chin State atanga raltlante an tam ber a. Tun thlenga Chin State atanga Mizorama raltlante hi, mi 24289 an nih tawh thu CM Pu Zoramthanga chuan Session-ah a sawi.
Myanmar raltlante hi Mizoram khawpui Aizawl bakah District hmun 11-ah an in zarpharh a, a tul ang zelin Mizoram sorkar leh tlawmngai pawl ten hma an lak zel dawn thu a sawi bawk.
‘Ni tinin raltlan luh belh an awm zel a, Chin State atanga lut an thahnem ber a, Mizoram sorkar, Kohhran hrang hrang. Mizo Student Union leh tlawmngai pawl hrang hrang ten an puibawm zel a, raltlante pawhin lawmthu an sawi chamchi thu’ CM Pu Zoramthanga chuan a sawi bawk a.
India, UN Convention on Refugee thuthlungah chuan raltlante tan mikhual theihna dan a awm loh angin Myanmar raltlante tan Chance a awm lova. Chuvang chuan Mizoram sorkar hian tanpui turin an ngensak thu Pu Zoramthanga chuan a sawi.
Military Council ten Feb.ni 1 atanga sorkarna an lak hnu hian Military Council leh PDF te inkahna Chin State leh Sagaing Region-a mipui te hi Chin State ramri Mizoramah an tlanchhe nual tawh a ni.
