Maynmar ramah military council-in thuneihna an lak hnuah politics dinhmun avanga Mizorama raltlante chu unau ang taka lo tanpuitu Mizo Forum chungah Chin mite aiawh leh Ram aiawha a lawmthu Mizorama awm mek Chin state Chief Minister hlui Salai Lian Luai chuan a sawi a.
October ni 29-a Mizoram state, Aizawl khawpuia hman a vawi 19-na Mizo Students’ Union General Conference-ah Guest of honour-a sawm Salai Lian Luai chuan chutiang chuan lawmthu a sawi a ni.
Ani chuan Myanmar ram dinhmun sawi chian theih a la nih loh avangin, dawh thei taka raltlante tanpui chhunzawm tur leh raltlante zingah pawh thil tihsualte an awm theih avangin, unau anga hrethiama ngaidam zel turin a dilsak bawk a.
Mizo Students’ Union, President Pu Lalmuanzuala pawhin, an theihna zawnga raltlante tanpui an tum thu leh raltlante chu ei leh bara an tlakchham loh tur thu a sawi a.
Chutih rualin, Mizote pawh indona avangin, tun hmain Myanmar ramah mi tam tak an tlan chhia a, chutih laia lo tanpuitute chu kan la theihnghilh lo a; chuvangin, tuna Mizorama raltlante chu kan lo tanpui let leh hi kan mawhphurhna a ni tiin, Mizo Students’ Union President pawhin a sawi bawk a ni.
