Rakhine State, Rathedaung towmship-ah May 14-a MOCHA thlipui tleh avang khan Bawng leh Lawi 2000 chuang an thih thu hriat a ni a.
Heng ran rual tam tak an thihna hmun hi Rathedaung township-a khaw 4-ah te an ni a, khaw thenkhatah pawh an thih nual thu ran thi zat chhinchhiahtu lehkha ziak mi Wai Hin Aung chuan heti hian a sawi.
“Bawng leh Lawi an thih tamna ber chu Rathedaung township-ah a ni a, an thi tam khawp mai. May 19 khan kan va tlawh a, DoPaih khua, SinPaih khua, KuTanKauh khua, CheingKaLing khua leh a chhehvelah Bawng leh Lawi 2000 chuang a thih thu kan hria a. Hei pawh hi tualchhung miten an chhinchhiah dan chauh a la ni rih a, Rakhine State pum puia sawi dawn chuan hei ai hian a tam mai thei. Tun dinhmunah hian Phone signal a that loh avangin thil chinchang a la hriat theih rih loh” tiin a sawi a.
Tun dinhmuna an chhinchhiah dan hi khaw 4 huam chhunga mi chauh a la ni rih a, khaw hrang hranga thi zat an la chhui mek a, tuna thi zat ai hian a tam mai thei tiin ziak mi Wai Hin Aung chuan a sawi bawk.
MOCHA thlipui avangin Rathedaung khawpum deuhthaw a chhe vek a, a khaw chhehvel pawh a chhiat nual thu Wai Hin Aung chuan heti hian a sawi leh a.
“Rakhine State-a township 9 deuhthaw thlipuiin chenna in a nuai chhia tihtheih a ni a, a chhiat dan hi a zat chiah kan la hre thei rih lo. A chhe lo aiin a chhia a tam zawk “ tiin a sawi a.
Heng a chhiatna zualpui Rathedaung township-ah hian ei in leh tui thianghlim bakah damdawi an mamawh nasat thu hriat a ni a.
He MOCHA thlipui avang hian khaw 9-ah chenna in, Clinic leh sakhaw in zaa 90 chuang a chhia, tuna hriat chinah chuan tualchhung mi 450 aia tlem lo an thih tawh thu hriat a ni bawk.
