MOCHA thlipui tleh nasat avangin Myanmar ram chhungah chhiatna a thleng nasa hle a, Chin State leh Rakhine State hi chhiatna nasat ber dawttu a ni a, UN leh ram hrang hrangten chhawmdawnna an pek rih loh avangin tualchhung mipuiten harsatna a tawh thu Khumi Affairs Coordination Advisory Council chairman U Pyi Min chuan a sawi a.
“Rakhine State tih lohah chuan Chin State hi an nasa ber a, UN Agency te pawhin tanpui an tum a. Township 9-a chhawmdawl tur chuan thil harsa tak a ni a, NUG-ten thlipui tleh hmain an theih ang tawkin an pui ve a. Tunah chuan ei in lamah an la harsa mek a, tanpuina a la thleng bawk si lo, theih tawpa tanpui an ngai a ni” tiin U Pyi Min chuan a sawi zui a.
May 14 khan MOCHA thlipui avangin Chin State pum puiah sakhaw in, zirna school, chek in telin chenna in (Building) 3000 chuang a chhia, Matupi, Paletwa, Mindat leh Kanpalet township-ah te chhiatna a thlen nasat thu hriat a ni bawk.
MOCHA thlipui avangin Matupi township-ah chenna in 1211, Mindat township-ah In 654, Paletwa township-ah in 400, Kanpalet township-ah in 211, Halkha township-ah in 41, a vaiin In 2774 a nuai chhia a, Tawnzang township-ah erawh chhiatna a awm loh thu ICNCC-ten May 23 khan an thuchhuahah an tar lan thu hriat a ni.
Heng bakah hian Chin State pum puiah zirna school 165, sakhaw in 102, health department in 12, chhek in 259, Hall 6 te bakah Lawi, Bawng, Sial 50 chuang, ar, varak 13 leh vawk, kel 6 an thih thu hriat a ni bawk.
Township hrang hrangah MOCHA thlipui tuarten chhiatna an tawrh nasat avangin in sakna tur leh in chung khuhna, perek, ei in leh damdawi bakah mamawh chi hrang hrang chhawmdawl an ngaih thu ICNCC chuan an thuchhuahah an tar lang a ni.
