Mandalay region, MohTaYar township-ah Military council sipaite operation an neih lai, an lambunnaah Military council sipai 4 an thih thu MyanDar operation (Mandalay)-a thuneitu pakhat chuan Yangon Khit Thit Media a hrilh a.
May 30 zing dar 9 vel khan MohTaYar township, Myaung U khuaa buk khuar mek Military council sipaite chu LetPe khua pan an tum laiin kawng lakah an lo lambun a, Military council sipai 4, mit hmuhin an thi a, PDF lam thi leh hliam awm lovin an kirsan thu hriat an ni a.
“Myaung U khuaa buk khuar mek Military council sipai 40-te feh chhuak chu LetPeGyi khuaah sniper leh ralthuam hrang hrangin an beih rawn a, Military council sipai 4 mit hmuhah an thi nghal” tiin MyanDar operation (Mandalay)-a thuneitu pakhat chuan Yangon Khit Thit Media a hrilh a.
May 28, chawhnu dar 2 vel khan Bago tlangdung-a Military council sipai 41, Battalion 66 te chu PaungTi township PDF Battalion 3601-ten an beihnaah Military council sipai officer pakhat a thih thu hriat a ni bawk a.
Hetiang vek hian Magway region, SiTohTaYar township chhim lam Km 13 vela hla awm, Mandat khuaa Military council sipaite an beihnaah Military council sipai 3 an thi a, mi 4 an hliam thu PRA-Magway te hnen atanga hriat a ni a.
May 23 zing dar 11 pawh khan heng Military council sipaite, PDF tangrual pawl PRA-Magway leh Z-Figter-ten an beih rawnnaah PDF sipai pakhat a boral a, PDF sipai pakhat a hliam thu an sawi bawk.
Hemi hnu hian SiTohTaYar township, KyunTaw (Chun Taw) kawtchhuaha Military council sipaite check gate, Rocket hmanga an beihnaah Military council sipai 2 an thi a, hliam an awm nual thu hriat a ni a.
He inbeihna hi PDF tangrual pawl lianten an sawi ho hnua an beih rawn thu hriat a ni bawk.
