Myanmar rampumah thla kal ta April thla chhung khan chenna in leh sakhaw in bakah Clinic telin 4095, Military council sipaiten an hal chhiat thu NUG Home affairs and Immigration Ministry leh Fire Service Department-ten May 3 khan an thuchhuahah an tar lang a.
Sagaing region-ah In hal tum 60 a thlennaah In 2477 leh sakhaw in pakhat bakah Clinic pakhat a kang chhia a, tualchhung mipui 10 chuang vel an boral thu an thuchhuahah an tar lang bawk a ni.
Military council sipaiten Mandalay region-ah In 453 leh zirna school 2, Magwe region-ah In 353, sakhaw in 1 leh Hall 1, Chin State-ah In 145 leh zirna school 2, Kayin State-ah In 63 leh sakhaw in 1, Tanintari (Ta Nin Ta Ri) region-ah In 8, Mon State-ah In 3 leh Yangon State-ah In 1 an hal thu hriat a ni a.
Heng an chhinchhiah zawng zawng te hi kawng hrang hrang atanga an hriat dan a ni a, chik zawka chhui phei chuan hei ai hian a tam zawk an ring a ni.
April 30 khan Military council sipai 20 rual ten Sagaing region, Ye U township, Ngoh Tong khua an luh chilhnaah chenna in 20 chuang an hal a. Thinga sak In a nih avangin a alh tha duh hle a, Bawng leh Lawi bakah vawk leh Ar thlengin a kang ral vek thu an sawi a ni.
Military council sipaite hian mipui chenna in pakhat mah kan tiriralin kan tichhe ngai lo tiin an sawi a. Thil chinchang chhuitu pawl Data For Myanmar-ten an chhinchhiah dan chuan Military council sipaiten thuneihna an lak hnu atanga kumin February thla thleng khan Myanmar ram chhungah chenna in 60459 an hal chhiat tawh thu an tar lang bawk a ni.
