Myanmar rama chhawmdawl ngaite tan ASEAN-a Minister te Meeting chu May 6 hian Cambodia, Phnom Penh khawpuiah neih tum a ni.
He Meeting-ah hian Myanmar-a ASEAN palai, Cambodia Foreign Minister, PRAK sokhonn leh ASEAN Gen. Secretary, Dato Lim Jock Hoi ten Chair an lak dawn thu Phnom Penh Post chuan a tar lang.
He Meeting-ah hian ASEAN ten, dan anga rualkhai taka, mipui an awm theihna tur leh Myanmar mipuite eng tin nge kan chhawmdawl theih ang tih thu a tel.
Heng bakah hian Myanmar tan Covid Vaccine tanpui dan tur leh ASEAN-a tanpuitu pawl (AHA Centre) te boruak tawn mek te an sawiho dawn a ni.
He Meeting-ah hian ASEAN palaite a hmuna tel thei an awm angin Online atanga tel an awm dawn a. UN Agency te leh khuallian thenkhat te pawh Online atangin an tel dawn.
He Meeting turah hian Military Council, International palai U Ko Ko Hlaing te ho pawh Cambodia, Phnom Penh khawpuiah an thleng tawh.
Myanmar tana a tum 2-na chhawmdawlna a pawimawh thu leh tanpui ngai a nih avangin hetia Meeting neih a nih thu Myanmar, Military Council Foregin Office chuan an thuchhuah a tar lang.
Myanmar ten harsatna an tawh avanga a hun taka tanpui a ngaih thu Cambodia CM Hun Sen chuan May 2, khan Military Council puiba ber Gem. Min Aung Hlaing, Online-in a hrilh.
Tun dinhmun rihah chuan Military Council ten mipui tanpui lovin khaw tam takah chenna in an hal chhe nual a, Thlawhnain an Bomb bawk a, tualchhung mi manin an that nual.
ASEAN bakah ram hrang hrang ten Military Council kutah tanpuina an pek chuan mipui hnenah a thleng leh lo ang tiin tlawmngai pawl ten an sawi.
April 11 thleng khan Myanmar ram chhunga in leh lo tlansan, mi 912700 zingah Military Council ten sorkarna an lak hnu hian mi 566100 an tel thu UNOCHA chuan an thuchhuahah an tar lang.
