Military council ten Jet Fighter-in India-Myanmar ramri Mizoram lamah bomb a tlak thu-ah an dem hle a, hemi chungchangah YMA ten hma la turin India sorkar an phut.
Indo-Myanmar ramri Chin State Thlantlang township huam chhunga CNF Victoria camp, Military council ten January 10,11 khan Jet Fighter-in an bomb tumah bomb pakhat Mizoram, Farkawn ram chhungah a tlak thu hriat a ni.
Hemi chungchanga Mizoram, Tuipuiral Group YMA ten January 12-a an thuchhuahah chuan Military council sipai ten CNF hmunpui Victoria camp an beih chungchangah an dem nasa hle a. Mizoram lamah bomb a tlak bakah ramri-a balu phur motor pakhat a chhiat thu an sawi bawk.
Military council ten kan hnung lawk pawh khan inzah derna awm hran lovin India lamah Jet Fighter an thlawk kual tawh a, tun tumah bomb an thlak thu Tuipuiral Group YMA ten an sawi.
India lama bomb a tlak avangin lo neitute leh balu la thin ten him tawkah a ngaih loh avangin hmun him lamah an in saseng nual thu hriat a ni.
Military council ten International law an bawhchhia a, Myanmar sipai sorkarin an Jet Fighter India ram china an thlawhtir leh India ram chhung bomb an thlak chungchangah hma la turin India sorkar hi na takin kan phut a ni an ti bawk.
