India sorkarin KaLaTan project a neihna Sittwe Lawng chawlhna hmun chu kan hma lawk May 9 hian an hawn dawn thu hriat a ni a.
He Lawng chawlhna hmun an hawn tawh chuan India leh Myanmar insumdawn tawnnaah leh inkalpawhna a awlsam tawh ang a. A hawn hun an buatsaihna turah India sorkar Commerce Minister tel tura beisei a ni a, Myanmar Military council atangin Union government thuneitu pakhat a tel theih beisei bawk a ni.
He Kalatan project hi Nah Ah Phah sorkar lai kum 2009 atang khan hma lak tan a ni a. India north east-a awm Mizoram hi thiltih a harsat deuh avangin tuna Kalatan project hi India sokarin US Dollar maktaduai 484 senga an siam a ni a, he Lawng chawlhna hmun hi thil tangkai tak a ni ngei ang tiin State council chuan a sawi a.
He Lawng chawlhna hmun a hawn hnu rei lote atang hian India, Kolkata khawpui Lawng chawlhna hmun atangin Cement Ton 3000 chuang Lawngpuiin an thliar lut nghal dawn thu hriat a ni a.
Sittwe khawpui leh a chhehvela miten India siam bungrua leh thil siam chi hrang hrang an hmang thei tawh dawn a, Rakhine (Ra Khaing) State-te chuan hamthat kan dawng ve thei lovang tiin Rakhine-a sumdawng milian pakhat chuan a sawi thung a.
Tuna Sittwe khawpuia Kalatan lawng chawlhna hmunpui hi International level-a sumdawngna atana ruahman a ni a, tunah rih chuan harsatna a la awm rih thu hriat a ni bawk.
He Kalatan project atang hian Chin State chhim lam Paletwa khawpui atanga Mizoram State thlengin Km 10 chuang kawng an laih tlangna turah Myanmar-a company 4 ten mawhphurhna an lak dawn thu project-a thawk thuneitu pakhat hnen atanga hriat a ni bawk.
