Thai ram chhunga kawng hrang hranga an man tak Myanmar mi hnathawk 170 chuang te April 24 khan Ranong khawpui vaukam atangin Kawthoung (Khawh Tawng) khaw lamah an thawn haw hlawm a.
An thawn kir tak te hi Thai Tan in hrang hranga thubuai neia tang te an ni a, Ranong Immigration hmun atanga haw kir leh duh, thla 3-6 chhung tangkhang te an ni hlawm a. Hetia an thawn haw hnu hian Kawthoung sorkar thuneituten Covid-19 hrik an pai leh pai loh an en chhinnaah mi 12 hri kai an hmuh thu Kawthoung Education and Development Foundation Migrant Worker Resource Center (MWRC)-a thuneitu U Pho Way chuan heti hian a sawi.
“April 24 khan an hnathawhna hmuna thuneituten Ranong atangin chhan hrang hrangte avangin hnathawktu mi 170, kan awmna Kawthoung khawpuiah an rawn thawn kir tawp mai a. Hmeichhia 45 an tel a, Ranong atangin Kawthoung-ah Lawngleng hmangin an rawn thawn haw a. Kawthoung khawpuia thuneituten an hriselna te kan lo endik a, thurawn te kan pe bawk a. Hmun hla deuha awmte Lirtheiin kan thlah zung zung a. Khua a lumin ni a sa hle a, hrilselna kan test-naah Covid-19 hri kai mi 12 kan hmu” tiin a sawi a.
Tun dinhmunah hian Ranong Tan ina la chhuah tur mi 10 vel lek an bang tawh a, rei lo te chhungin Jail tang an tam sawt leh hle ang tiin a sawi zui bawk a ni.
“Tun Tuitheh Kut hma leh a hnu hian vawi 3 an rawn thawn haw tawhnaah mi 700-800 vel an ni tawh a. Tunah hian Ranong Tan inah Tang mi 10 chuang 20 vel chauh an awm tawh a. Tun atanga thla khat hnu velah chuan mi 200 chuang 300 vel an tling leh mai ang; ni tin an man deuh reng mai a ni” tiin a sawi bawk.
