Myanmar Military council-ten thuneihna an lah hnu atangin kumin 3023 April thla thleng khan a huhova an thah zawng zawng hi mi 1592 an tlin tawh thu Nyian Lin Thit (Ngian Lin Tit) Research pawlten May 26 khan an thuchhuahah an tar lan thu hriat a ni a.
Military council sipaite hian mi 5 aia tlem lo awm khawm te an thah hi vawi 147 a nih tawh thu an sawi bawk a.
Hetia an huhoa an thahna hi kawngzawh te, Thlawhna atanga bomb thlak te, ralthuam lian hmanga an beihna te leh khawchhung then fai hna an thawhna atanga tea an thah te a nih thu an thuchhuahah an tar lang a ni.
Heng zingah hian chung lam Thlawhna atanga an bomb-na hi 32% niin mi 508 an boral tawh thu hriat a ni bawk.
A huhova an thahna township-te chu WetLet, YinMaPin, Kalaymyo, KanBaLu, PhaKant township te an ni a. KanBaLu township-ah mi 217, PhaKant township-ah mi 83 an boral tawh thu Ngyan Lin Thit Research pawlten an tar lang a ni.
Heng Research pawlten an tar lan tak te hi RFA telin Media lianten phek 40 chuang an tar lan bakah PDF-ten social media-a an tar lan mi 1300 lak khawm te chu Ngyan Lin Thit Research pawl te leh political advisor Ko Moe Thet Ni ten May 25 khan RFA Media hnenah an hrilh thu hriat a ni.
Ngyan Lin Thit Resaerch pawlten an tar lan chungchangah Military council thupuangtu General Zaw Min Tun, RFA Media-ten phone hmanga an zawhnaah chhanna a la awm rih lo a ni.
