Myanmar Military Council ten sorkarna an lak, kum 2021 February 1 atanga kumin 2022 July 31 thleng khan Myanmar ram chhungah inkahna tum 6600 chuang a thlen tawh thu ISP-Myanmar chuan August 28 khan a tar lang.
Heng zingah hian Kayin State-ah inkahna tum 3993 niin a tam ber a. Sagaing Region-ah inkahna tum 641 thlengin a dawt leh a. Myanmar laili Magwe Region, Ethnic Group tamna Kachin State leh Kaya State-ah inkahna a hluar hle bawk.
Ralthuam keng tawh zinga hlun tak KNU thununna, Kayin State-a khawpui hrang hrangah indona runpui thleng lem lo mah se, inkah zeuh zeuh an thleng nual tawh a. Tun hmaa zalen taka awmna hmun, Myanmar hmun laili Sagaing Region-ah Military Council ten sorkarna an lak hnu hian, tum 600 chuang inkahna a thleng tawh a, thil thleng danglam tak a ni tiin Politician ten an sawi.
Tun dinhmuna kan thlir chuan Sagaing Region-a township 37 zinga township 34-ah inkahna a thlen mek thu ISP-Myanmar-a an hotu lu ber Ko Kyaw Thet Aung chuan RFA a hrilh.
“ Sagiang Region huam chhungah inkahna a thleng mek a. Khawpui thenkhatah chuan tum hnih khat an inkap a. Sagaing Region-ah towmship 37 a awm a, chung zinga township 34-ah inkahna a thleng mek. Inkahna awm lohna, hmun hla zawka awm Nanyun (Nan Yun) township, Lashi (La Si) township, Lahe (La He) township te an him thung a. Sagaing Region-ah hian PDF an tam hle a, chuvangin beih pawh an tawk nasa reng a ni” tiin a sawi.
He mi chungchangah Military Council thupuangtu Major General Zaw Min Tun-a RFA-in a phone a, chhanna a awm lo.
Sagaing Region hi, nek cheptu te an tam hle a, NLD bukna hmun a nih avangin Military Council ten hma an lak nasat thu, Sagaing Region, Pa Le township-a PDF Battalion 2-a Battalion Commander Ko Ngya Gyi (Ko Ngia Chi) chuan RFA a hrilh.
“ Sagaing hi inbeihna hmunpui a ni a. Phai leh tlang hmun, a inzat thuak a. Sagaing Region township 37-ah Sipai sorkar duh lo NLD awmna vek a ni a, Leilet mi deuh vek an ni. Nek chepna duh lova ram tan an feh chhuak nual avangin buaina a tam phah a ni” tiin a sawi.
Tun hma chuan Sagaing Region-ah hian Military Headquarters-ah Battalion pakhat leh Division pakhat chauh a awm a, an thunun thei lo tiin Military analyst chuan RFA a hrilh.
Tun hnuah hian Sagaing Region-ah ralthuam kengte beihna a nasa hle a, Military Council ten khawmual, tui lam leh chung lam atangin an bei nasa hle tiin Military analust leh PDF Battalion ten an sawi.
NUG sorkar chuan Military Council-te kan hneh chuan Sagaing Region hi zalenna hmun hmasa ber a ni ang tiin an beisei thu a sawi.
Kayin State-ah Military Council ten sorkarna thla 18 chhung an lak hnuah inkahna tum 3993 a thleng tawha, a tam ber thlenna hmun a ni. Kayin State, Hpapun (Pha Pun) township-ah pawh inkahna tum 3734 aia tlem lo, a thlen tawh thu ISP-Myanmar chuan a thuchhuahah an tar lang.
