Myanmar Military council ten kum 2023 January thla khat chhungin tualchhung mi 116 an that a, region leh state 7-ah chenna in 5000 chuang an hal chhiat thu NUG sorkar Justice Ministry chuan an thuchhuahah an tarlang.
Heng an thah zingah hian mipa 78, hmeichhia 24, Buddish puithiam leh Pastor 3, naupang 10, an vaiin mi 116 an thah thu an tarlang a ni.
Heng an thah chungchangah Military council thupuangtu General Zaw Min Tun, RFA Media Washington DC Office atanga an zawhnaah chhanna a awm rih lo.
NUG sorkarin a chhinchhiah danin mi 100 chuang an thah zingah Sagaing region-ah mi 80, Mandalay region-ah mi 11, Magwe region-ah mi 8 an ni a. Naupang 10 an thah zingah Sagaing region atangin naupang 9 leh Kayin mi pakhat an tel a ni.
Thla khat chhunga Military council ten an beih avangin mi 37 an hliam a, heng zinga mi 25 te hi Sagaing region mi te an nih thu NUG chuan a sawi a ni.
Thla khat chhung hian chenna in 5079 an hal chhia a, heng zingah Sagaing region-ah In 4775 leh Magwe region-ah In 211 an hal chhiat thu NUG chuan an tarlang bawk.
NUG sorkar Justice Ministry chuan dan lova an chetna te, human right an pal zutna leh mihring an suatna te an chhinchhiah zel a. Dan kalhmang dik tak a nih theih nan NUG chuan mipui te a hriattir a ni.
