Myanmar raltlan chungchangah Australian Senator-in Mizoram Governor a kawm

0

Mizoram rawn tlawhtu Australian Senator Dean Smith chuan October 6 khan Myanmar raltlan chungchangah Mizoram Governor a kawm a.

Mizoram Governor Hari Babu Kambhampati chuan Raj Bhavan-ah a kawm a. Governor leh Australian Senator inkawmnaah hian Mizoram dinhmun leh hmalakna te an sawidun a. India leh Australia te inlaichinna chu tun hnaiah nasa takin hma a sawn tih an sawi. In sumdawn tawnna bakah kawng hrang hrangah an in thian thatna hi tingheh a ni mek zel tih an sawidun bawk.

Senator Dean Smith hian Mizoram a rawn tlawh chhan pawimawh tak pakhat chu Myanmar raltlante chungchang a ni tih a sawi a. Mizoram sorkarin engtin nge hma a lak tih te bakah refugee-te ngaihsak an ni em tihte a zawt a.

Governor Hari Babu Kambhampati chuan Myanmar sorkar sipai thuneihna hmanga paih thlak a nih hnuah Mizoram hmun hrang hrangah raltlante an rawn lut a. Hei hi humanitarian ground angin khap leh dan phal a ni lo. Raltlan tam takte hi Chin state-a Mizo hnahthlakte an nih thu sawiin Mizoram mipui ten an theih anga thain an lo chhawmdawl a. Sorkar pawhin thil tul bikah hma a la thin tiin a chhang.

Senator Dean Smith chuan Mizote leh Chin state-a cheng te chu unau an ni tih a lo hriat thu a sawi a. Australia-ah pawh Chin state-a mite tam tak an awm mek thu te leh Australia sorkarin a ngaihsak thu te a sawi a. Myanmar mipui sorkar sipai thuneihna hmanga paih a nih tak avanga mipui tawrhna chu Australia sorkar chuan pawi a tih thu te sawiin Myanmar sorkar thiltih dan pawh uluk takin a thlithlai mek a. India chu thian tha a nih anga Myanmar raltlante tha taka lo enkawl turin a ngen bawk.

Australian Senator hi Pu H.Rammawi, Vice Chairman, State Planning Board-in a rawn tawiawm a. Chief Minister Pu Zoramthanga a kawm a. CYMA hotute pawh a kawm thu hriat a ni.

Share.

Leave A Reply

Exit mobile version