Myanmar atanga Mizorama raltlante chhawmdawlna a beitham deuh tawh avangin ei in leh silhfen chungchangah harsatna an tawh zual thu Mizorama innghat, ZORO pawl ten an sawi a ni.
Myanmar-ah Military council ten thuneihna an lak hnu hian Chin mi thenkhat te Mizoram State-ah an raltlanna kum 2 vel a ni tawh a. Hun a lo rei takah chuan chhawmdawlna chungchangah harsatna a lo awm chho zel a, ei in leh silhfenah harsatna an tawh zual thu March 17-a Mizoram State, Aizawl khawpui, Aizawl Press Club-a neih Press conference-ah Zo Reunification Organization (ZORO) ten an sawi a ni.
“Raltlante hi an harsa khawp mai, hnathawh tur an nei lova, tun hmaa mipuite leh YMA ten an tanpuia dawng lo te pawh an awm nual a. An ni tin mamawh a la danglam loh avangin an mamawhna a sang zual a ni” tiin ZORO Fefugee Committee-a secretary Dr. Lalrinawmi Ralte chuan a sawi a ni.
March 14 khan Nghalchawm raltlan camp-a Myanmar raltlante, ei in an chatlak avangin ZORO pawl ten buhfai ip 20, be ip 2, multila ip 3, tel leh thawmhnaw te an tanpui nual a ni.
Raltlante tan hian fur a hnaih tawh avangin an tawm hulna tur silpaulin leh mau rua bakah an mamawh thil te kan puih a ngai zual hle a ni tiin an sawi bawk a ni.
Heng bakah hian damdawi te, zirlai naupang uniform leh an pawimawh dang te bakah raltlante tan hnathawh tur zawnsak a pawimawh thu ZORO pawl ten an sawi a ni.
Hetia raltlante chhawmdawlna a beitham deuh tawh avangin ZORO pawl raltlan tanpuitu ten theihtawp chhuahin hma a lakpui dawn thu a sawi a ni.
ZORO pawl hi India, Myanmar leh Bangladesh-a Chin-Mizo te insuihkhawm leh tura hma latu te pawl an ni a, Mizorama pawl lian tak leh thawm nei tak pawl te an ni a.
Tun dinhmunah hian Myanmar atanga Mizorama raltlan mi 30000 chuang an awm thu Mizoram sorkar chuan a tarlang naa Chin mi hruaitu pawl te chuan mi 50000 vel an awm an rin thu an sawi bawk a ni.
