Myanmar ramah sipaiin thuneihna an lak hnua, mahni in leh lo tlansana India ram lama ral tlan tam takte thawn kir leh turin India leh military council te a ruka an inbiakna lehkha pakhat put chhuak a awm a.
Military council Foreign Minister U Wana Maung Lwin chuan August ni 5 date hmangin, ram chhung administration council office-a a pek luh, lehkha thurukah chuan Myanmar ram lam atanga India rama lutte chet dan te, dan lova pem lut te chungchang hriat a awm chuan Myanmar lama chanchin inhriattir turin Ministry of Foreign Affairs, Union Minister leh Myanmar India Ambassador-te nena inbiakna chu July ni 26-a neih a nih thu a chuang a.
Chu mi chungchang nena inkaihhnawihin Myanmar ram leh India ram inrina hmuna awmte chu an awmna hmuna thawn kir leh vek turin India ram, Mizoram state sorkar kaltlangin Kolkata khawpuia Myanmar consulate office lama hriattirna thu thawn a nih thu hriat a ni.
Mizoram state sorkar lam atanga thu thawnnaah chuan Myamnar ram chhung dinhmun a him tawk loh avangin, mahni in leh lo tlansan Myanmar mite him taka an khawsak zel chu thil pawimawh tak a nih angin, ram pahnihte ramri kana kalte thawnkir leh tur leh an khawsakna ngaihtuah turin thuneitu pawl lamin fel fai taka thawnkir, him taka an awm theih nana tanpuina pek a ngaih thu chu lehkha thuruk-ah tarlan a ni a.
Chu bakah, Myanmar-India ram pahnih inkara raltlante thawnkir leh an awmna tur ruahmansak chungchangah ram pahnihte chu central sorkar high lelvel-a inbiakna nei thei tur leh, Myanmar lama mawhphurtu, kaihruai tur department ruat turin Myanmar Minister of Foreign Affairs chuan State Administration Council hnenah dilna a thlen thu chu lehkha thurukah tarlan a ni bawk.
Myanmar ramah kum 2021, February ni 1 atanga thuneihna lak a nih hnuah Myanmar mite chu military council lak atanga chhuak zalen turin India hmar chhak, Mizoram state-ah an raltlan a.
India ram chu Refugee Convention-a hming a ziah luh vel oh avangin, Mizoram state-a raltlan, Myanmar mite chu an awmna hmuna thawn kir leh turin sorkar laipui chuan thuchhuah siamin Mizoram sorkar chu a nawr reng a ni.
Mahse, Mizoram state Chief Minister Pu Zoramthanga chuan a state-a ratlante chu thawnkir a tum loh thu India sorkar laipui hnenah a thlen tawh a, tun thlengin a pawm reng a, raltlan camp te hawngin a chhawmdawl reng bawk a.
Tuna lehkha thuruk put chhuah chungchangah military council lehkha thuruk chu a dik leh dik lo finfiah a la nih loh rualin, chu lehkhaa Mizoram sorkar lamin Kolkata-a awm Myanmar Embassy office-a a thu thawn tih pawh finfiah tum mek a ni.
(He mi chungchangah hian Confirm-na chiang tak awm lo mahse, Khit Thit media chuan he thu put ru avangin military council lamin sorkar hnathawk 100 dawn hreng bet a, thu a zawhfiah thu a tarlang a. Naypyidaw lam source pakhat chuan, “India lama Foreign affairs lamin lehkhathawn put chhuah avangin, foreign department lam staff 30 vel chu thu zawhfiah an ni a. New Delhi-a awm Myanmar Embassy pawh a leak out dan zawh a ni bawk a. Mahse in man tak chu a la awm lo, thu zawh fiah mek chauh a ni,” tiin a tarlang a. Chutih laiin thenkhatin Mizoram sorkar chu inrawlhna a neih loh thu leh raltlante tan engmah a thlen loh tur thu an tarlang a ni. Mahse media thenkhatin an tarlan dan chu kan han thai lang ve a ni e.)
