Myanmar Raltlanten ID Card Nei Dawn

0

Chin state nena inramri India ram, Mizoram state chhunga raltlante chu Mizoram chhungah him taka an awm theih nan Mizoram sorkar-in Refugee ID pek chhuah a tum thu hriat a ni.

Chu mi chungchang chu Mizoram sokarin raltlante tana, DC, Home department leh DM&R te kaltlanga a din Task Group pawlin January ni 19 khan Aizawl khawpuia raltlante awmna camp-ah kalin chu mi pala thuneitu pakhatin a sawi chhuah thu NGO United for Democratic Myanmar pawl hnen atanga hriat a ni.

Chu pawl chuan January ni 19 chawhma lam dar 11 khan Sihphir venga CDM raltlante awmna hmun chu an han tlawh a, raltlante tana mamawh chu an theih tawpa an tanpui zel tur thu an sawi a.

Chu bakah, chawhnu lam dar 2-ah pawh Myanmar MP ho awmna hmun an tlawh leh a, MP te pawhin an mamawhte thlenin an sawiho a, thawhho zel an tum thu pawh hriat a ni.

Chu pawla thuneituten January ni 18 pawh khan Sihhmui leh Sairang venga raltlante chu an lo va tlawh tawh bawk a, ramri lama awm raltlan camp te pawh Covid hrileng dinhmun a that chhoh chuan a hmuna en an tum thu hriat a ni a.

India ram Mizoram state-ah Myanmar ram lam atanga raltlan lut tawh zat chu sing 3 chuang an awm tawh a, chung mite chu Mizoram sorkar leh tlawmngai pawlten tanpuiin, an chhawmdawl mek a ni.

Share.

Leave A Reply

Exit mobile version