Myanmar ram chhungah Military council-te chetna avangin tualchhung mipuite in leh lo an tlansan nual avangin Bangkok khawpuia Myanmar mi pem hnathawkten May 1, International Workers' Day khan Bangkok khawpui ABC world Center-ah sum zawnna an buatsaih a.
He sum zawnnaah hian Driector The Khit Nay Video film lak “Khawchhunga Rawlral” Movies film chhuah a ni a.
He film hian Military council-ten an khai hlum tak Ko Zayar Thaw-a hringnun hmachhawn dan a lakna leh Spring Revolution beitu ram tana nunna hlantute zahna chibai bukna film a nih thu a huaihawttuten an sawi a.
Sum zawn nana buatsaih mah ni se, a thlawna en theih niin tum 2 chhuahin hun an hmang a, spring revolution chhinchhiahna T-shart, Daw Aung San Suu Kyi lem chuanna kawr leh Bag chi hrang hrang te zawrh a ni bawk a.
Film an chhuahna Screen hma Dawhsanah hnam lam chi hrang hrang neih a ni a. Bangkok khawpuia Myanmar miten May 1, International Workers' Day, an hun awl a nih avangin an hlut hle a, kal an thahnem hle tih thu hriat a ni bawk.
He function pawimawh tak hi Bangkok khawpuia spring revolution beitute zinga pawl 24-te huaihawtnaa buatsaih a nih thu huaihawttu zinga thuneitu Ko Shaing Aung chuan heti hian a sawi a.
“Pawl hrang hrang 24 insuihkhawm hminga buatsaih a ni a. Kan tih chhan ber chu Myanmar-a raltlan te, ram tana nunna hlantute chibai bukna leh PDF tan” tiin a sawi a.
An pawl zinga thuneitu dang Ko Shaing Linn chuan “He function buatsaihna turah hian harsatna kan tawk ve a, sorkara phalna lak chungchungah leh security ten kan mipuite an venna chungchangah a ni ber mai” tiin a sawi bawk a ni.
He hunpui tan hma hian NUG Acting Chairman Duwa Lashi La, duhsakna lehkhathawn leh Ministry of Labor hnen atanga duhsakna lehkhathawn an chhiar a. Heng bakah NUG Electric and Energy Minister U Soe Thura Tun chuang online kal tlangin thu a sawi zawh hnuah hunpui chu tan a ni a.
Hnam chi hrang hrangah hian Kayin hnamin an culture lam an entir a, a hnuah Myanmar culture lamin an show zui nghal bawk a. Hemi hnu hian Driector The Khit Nay-a a Video lak “Khawchhunga Rawlral” film chhuah chhunzawm ngal a ni a. He hun mawimawh tak hi tel loh theih loh hunpui a ni tiin a hmuna tel ve mi pakhat chuan heti hian a sawi.
“He hunpuia ka rawn kal ve thei hi spring revolution tel angah ka inngai a, an Cinema chhuah hi eng ang hlutna nge a neih tih ka hriat duh vang a ni” tiin a sawi a ni.
He hunpui hmang tur hian Myanmar atanga pem hnathawk leh chhungkua 300 chuang an tel thei a, an thil hralh zawng zawnga a hlep Bath nuai khat chuang a nih thu function huaihawttu zinga thuneitu pakhat chuan a sawi a ni
