Myanmar, Rampum Huapah Kar Khat Chhung Current Off Dawn tih puan a nih hnuah hmun thenkhat erawh pek a nih tur thuin military council-in thuchhuah a siam nawn leh avangin, mi tam tak nuih a tiza hle a.
Myanmar ram chhungah March 12-18, 2022 chhung hian Kawlphetha an pek chhuah dawn rih loh thu Military Council ten thu an chhuah zet hnuah hmun thenkhat chu part time-a pek chhunzawm a nih tur thu leh mipuite thlabar lutuk lo turin power department lamin vawiin lamah thuchhuah an siam nawn leh a ni.
Ministry of Electrical Power hian tuipui kam atanga Natural gas Project an hman mek YadaNa, ZawTiKah, Swe Kanlun Project leh khawmual atanga natural gas atangin Kawlphetha 1455 Megawatt a pe chhuak thin a.
Tuna natural gas an hmuh thar khur 2 hi tuipui hnuaiah pipe-a an zam dawn avangin March ni 12 atangin ni 18 thleng hmalak tur a ni a. Hemi avang hian March ni 12-18 thleng hian ram chhung hmun thenkhatah Current a awm dawn loh thu, Military Council ten an tar lang.
Tun dinhmunah chuan LNG atanga power pek chhuah sensoin a phuhruk tawh loh avangin titawp a ni a. BiLu Chaung Hydel Project khawlpui pawh Bomb-a tihchhiat a nih avanga, siam that tum mek a nih thu Military Council ten an tar lang.
Tunhma kha chuan Myanmar ram chhungah 4200 Megawatt Power pek chhuah thin a ni a, tunah rih chuan 2177 Megawatt a pe chhuak mek a. Gas hmanga Power pek chhuah thin kha a thar duan leh tum a nih avangin chawlh lailawk tum a ni. Power 1304 Megawatt a kiam dawn a, rampum huapah 873 Megawatt chauh pek chhuah a ni dawn avangin, Power a awm dawn loh thu Military Council ten an tar lang.
Power pek chhuah dan tlangpuiah chuan chhun lamah 3400 Megawatt, zan lamah 3600 Megawatt, ni khatah chawhrualin 2600 Megawatt hman thin a nih thu, Military Council ten an thuchhuahah an tar lang a ni.
