Myanmar sipaite chuan Australia Defense hmanrua chu Barrett Communications hnen atangin radio lam hmanga inbiakna khawl pawimawhte a leina lehkha thuruk hai chhuah a nihna atangin Justice for Myanmar chuan chu inleichhawntirna chungchangah thuchhuah a siam a ni.
Chu lehkha thurukah chuan Barret kut chhuak PRC-2090 portable (ken sawn awlsam) chi sipai inbiakpawhna hmanrua, phone khawl, Battery pack, Modem, khawl part hrang hrang, Internet man theihna unit leh current tihsanna khawl te a tel hlawm a.
Barrett Communications website lama tarlan dan chuan chung inbiakpawhna khawl ho danglam bikna chu radio sound wave chu him taka pe chhuak (frequency hopping) thei tura design a ni a, Australia ramin khuahkhirhna a siamnaah chung thilte chu Myanmar rama thawn luh phal a ni lo.
Radio sound wave him taka pek chhuah theihna (frequency hopping) chu PRC-2090 atan quality tha tawk a ni lo a, Barrett Communications chuan Australia sorkar phalnain kum 2017 khan chung khawlte chu a tawp nan a lo hralh chhuak tawh a, chung inleina zawng zawng chu sumdawnna satliah atana chauh a ni a, PRC-2090 part te chu agent dangin an lo zuar chhuak zawk a nih thu Barrett compmay chuan a rawn chhang let vel eh a.
Barret company siamchhuah radio lama inbiakpawhna te chu sipai airpor leh sipai thlawhna tum tamna airport-ah vuah thin a nih thu Justice For Myanmar chuan a tarlang bawk a.
Firfiak sipai pawl chuan Barrett Communications siam chhuah khawl part hrang hrang bakah Airport-a hman tur radio-te chu Codan Limited atangin a lei bawk a. Chu mai duh tawk lovin, hmun hla tak thlenga Radio wave pe chhuak thei leh man thei modem (ultra-long range telemetry radio modems) te pawh RFDesign Pty Ltd atangin a lei bawk a ni. Chung Codan leh RFDesign Pty Ltd te chu Australia company te an lo ni leh zel tih hriat a ni.
Justice For Myanmar thupuangtu မရတနာမောင် chuan, “Australia sorkar hian tun ang huna Myanmar mipuite do tu firfiak pawl hnena heng khawlte a hralh chhuak hi engvangin nge a phalsak. Australia sorkar hian heng bungruate hralh phalna a pek hian anni nen lo tangho rengin thil an lo ti em ni tih hi kan hre duh a ni,” tiin a sawi.
Mahse, Justice for Myanmar thuchhuah leh Myanmar ram nena insumdawn tawnna an neih dan chungchang sawifiah tur ngenna chu Codan Ltd leh RFDesign company lam chuan tun thlengin an la chhang let lo tih hriat a ni.
