Thai leh Myanmar ramri, Myawadi khawpui kiang Me Ka Ne khaw bulah Military council sipaite leh KNLA, PDF tangrual te April 11 khan an inkap leh nasa hle a. Military council sipai ten ralthuam lian an chelek nasat hle thu PDF hruaitu Ko Saw Mon chuan VOA Media a hrilh.
“Zing atangin sumdawnna hmunpui Me Ka Ne khua Jet Fighter 2-in an bomb a, thi leh hliam an awm zat kan hre thei rih lo, an la inbei nasa khawp mai”
He inbeihna chungchangah Military council sipai thuneitute an phone-a an zawhnaah chhanna eng mah a la awm rih lova.
March 25-a tangrual pawl ten Myawadi khuaa sumdawnna hmunpui (Trade Zone) an beihna atang khan Trade zone tlak lam Ma Ka Ne khuaah Military council sipai ten raltuam liana an bomb chhunzawm leh avangin tualchhung mipuite an tlanchhe nuawl a. April 11 pawh khan ralthuam lianin an bomb nasat leh thu an sawi.
Kayin State, Myawadi township, Tone Tadar khua leh Me Ka Ne khua Military council sipai ten thunun an tum laiin tangrual pawl ten an bei a, Military council sipaite an hliam nual a, chung lam Thlawhna hmangin an bomb thu tualchhung mi ten an sawi a ni.
April 11 khan KNLA leh PDF tangrual ten ramri camp Drone hmanga an beih thu an sawi bawk.
“Cobra operation, Lion Battalion leh PDF ten kan beih rawn a. Military council sipai leh BGF te kan tinzawn ber a, mipuite kan hum bawk. Kohhran Biak in leh a kaihhnawih In, Damdawi in kan zuah a, thil dang zawng chu vawiin thlengin kan bei mek a ni”
