Shan State hmar lam Nawng Chhu towmnship TanBo khaw kiangah April 5 atang khan Military council sipaite leh Mandalay PDF inkahna avanga tualchhung mipui tlanchhia te vawiin thlengin mi 3000 an chuan tawh thu tualchhung mi te hnen atanga hriat a ni a.
He inkahna avang hian Khaw 7-a tualchhung mipuite an tlanchhe chiam a. April 11 thleng khan inkah thawm ri hriat zel a nih avangin khaw 3 an tlan belh leh a, an khaw chhehvel leh Buddhist puithiam hung chhungah an awm nual thu Kan Chi khuaa tualchhung mi pakhat chuan RFA Media hnenah heti hian a hrilh.
“Inkah thawm hriat tur a awm reng a, a reh lawk lovang. Khawchhunga awm kan tlanchhe vek a, eng tin nge an awm kan hre zui tawh lo. Tuna kan awmna khuaah hian mi 500 vel kan awma kan tlanchhe vek a, kan vaiin mi 3000 kan chuang tawh ang, tlan leh tur pawh an la awm nual” tiin a sawi a ni.
Raltlan tam zawk te hi NawngChhu leh Pyin Oo Lwin (Pin U Lun) khaw inkar Monastry leh an chhung te hnenah an la awm mek a, puithiam te leh tualchhung mipui ten an tanpui mek thu a sawi zui bawk.
Mandalay region PDF thupuangtu chuan NawngChhu township-a Ta Pyi Ngyo (Ta Pi Ngiu) operation leh Military council sipaite an inkap nasa hle a. Military council sipai ten Thlawhna leh ralthuam lianin an bei chiam a, thi leh hliam an awm ve ve niin an sawi a ni.
“April 5 atangin 11 thleng khan kan inbei char char a, April 10 khan Thlawhnain vawi 5 min bomb a, zanah pawh kan inbei tho. He inbeihnaah keini lam pawh thi leh hliam an awm angin Military council sipai lam pawh thi leh hliam an awm ve nual a ni”
April 5-a inkahnaah khan TanBo khuaa nuapang 2 an boral a, mi 3 an hliam a. Hukhu leh TanBo khuaa chenna in an kah chhiat nual thu tualchhung mi te hnen atanga hriat a ni.
He inbeihnaah hian Military council ten thuchhuah eng mah an nei lova, Shan State Military council thupuangtu U Khun Thein Maung RFA Media-in a phone-naah chhanna eng mah a awm rih lo bawk.
Kum 2022, August thla pawh khan NawngChhu township-a DuPin, KalaTue, LongKhan khuaah Military council sipaite leh Mandalay PDF te inkah tumah tualchhung mi a sang tel an tlanchhe tawh bawk a ni.
