-Sipai lam va enfiah tumin bomb rap puak nual bawk….
August ni 17 khan Ayeyawadi News-in a tar lan dang angin Kaya State, Lawpata Hydroelectricity atanga Naypyidaw khawpuia an zam electric tower 2 chu Phekone PDF ten an tihchhiatsak thu hriat a ni.
August ni 12-a Phekhone PDF ten an tihchhiat tak tower 2 hi August ni 17 zan khan an thuchhuahah an tar lang a. Phekhone PDF te hi Kaya State, Luaikaw township hrula awm, Shan State chhim lam, Phekhone township te leh Shan – Kaya ramria active pawlte an ni.
Phekhone PDF te leh Military council-te, August ni 12 tlai lam dar 3:00-a an inkah tum khan Lawpita atanga Neypyidaw khawpuia electric hrui zamna tower 2 kha Phekhone (ဖယ်ခုံ) PDF ten an tihchhiatsak kha a ni a.
He electric hrui zamna tower 2, Phekhone PDF ten an tihchhiatsakna chhan hi mipuite hman tur ni lovin sipaite tan chauha power supply an pek vang a ni a. Sipaite inrelbawlna tihtawp theih nana an ruahman a nih thu Phekhone PDF ten an thuchhuahah an tar lang.
He electric ban tihchhiat a nih hnu hian military council sipaite chu a hmun an rawn thawk chhuak ve nghal a, a hmun hma enchiang tura an pan hnaih laiin rahpuah bomb engemaw zat puakin, sipai thi an awm nual a rinawm thu PDF lamin an sawi bawk a. He lai hmun hi military council leh PDF lamte inkahna hmun a nih angin, an inkap deuh reng a, PDF lamin electric thir hrui ban chhiatna hmun thleng an rawn kal dawn tih hre lawkin, bomb an lo kam lawk vek a ni.
Lawpita Hydroelectricity hi Kaya State, Luaikaw township, Bilu tuikawra siam a ni a, kum 1954 khan power pek tan a ni. Bilu luikawrah hian No.1,2,3 tiin project 3 a awm a, Phekhone PDF ten an tihchhiatsak tak hi No.3-na niin Neyptidaw khawpuia an zam mi tower a ni.
Phekhone PDF te hi, Military council te sorkarna duh lova do lettu Phekhone township-a thalai rual te niin Kaya State-a Kayin Ni Army (KA) te, Kayin Ni mipui venghimtu pawl (KNDF) te, township tina mipui venghimtu pawl (KNDF) te leh sipai dotu te an ni a.
Phekhone PDF te hi May ni 13-a sipai te nen an kah hmasat ber tum khan Phekhone township leh Moe Bea township Police Station an beihnaah sipai leh police mi 20 vel an kap hlum a, police Station pawh an tihchhiatsak a.
He inbeihnaah hian Moe Bea-ah sipai lam an thi tam a, Lieutenant General Soe Win pawh a hmunah kal chilhin lusun chhung te hnemin pawi a tih thu a sawipui nasa hle.
