Myanmar khawpui ber Naypyitaw khawpui, Ley Way township, Tadar Oo khua leh Aung Min Kone khuaah April 21 chawhnu khan Tornado thlipui a tleh avangin mi 7 an boral a, chenna in 200 chuang a chhiat bakah hliam an awm nual thu tualchhung tlawmngai pawl zinga thuneitute hnen atanga hriat a ni.
April 21, chawhnu dar 6:00 vel khan Lay Way township, Tadar Oo khua leh Aung Min Kone khuaah Tornado thlipuiin a nuai nasa hle a. He thlipui tleh avangin Aung Min Kone khuaah Pitar pakhat leh mipa pakhat, Tadar Oo khuaah tualchhung mi 5, an vaiin mi 7 an boral a. Hliam mi 100 chuang zingah mi 20 te an dinhmun a derthawng hle nia hriat a ni a, Tadar Oo khuaah In 77 leh Aung Min Kone khuaah In 155, a vaiin chenna in 232 a chhiat thu hriat a ni bawk.
“Naypyitaw, Lae Way khawpui tlak lamah Tornado thlipui na zet a tleh a. Tunah rihah chuan mi tlawmngai mimal leh pawl hrang hrang ten theih tawp chhuakin then fai hna an la thawk mek a. Aung Min Kone khuaah kum upa hmeichhe pakhat leh mipa pakhat an boral a, Tadar Oo khuaah tualchhung mi 5 an boral bawk a. Tunah hian mimal tlawmngai leh pawl hrang hrang ten chhanchhuah hna an la thawk mek a. Thlipuiin a len chhiat In te eng mah seng hawi tur awm mumal lovin a darh nuai mai” tiin tlawmngai pawl zinga thuneitu pakhat chuan a sawi.
Hetiang vek hian Sagaing region, Kani township leh Budalin township-ah April 21 chawhnu khan thlipui a tleh nasa hle a. Kani township-a khaw 8-ah In 150 chuang a chhiat thu hriat a ni bawk.
