Tlawmngai pawl lian 5 intel khawm, NGO Co-Ordination Committee chuan, Manipur-a Zo hnahthlakte chunga tawrhna thleng mek hriatpuina leh tawrhpui nan Mizoram pumah “Zo hnahthlak unaute thlavang hauhna” kawngzawh huaihawt a nih dawn thu hriat a ni a.
July 20 khan Central YMA Committee room-ah thu khawmin, Manipur buainaa Zo hnahthlakte tawrhna chungchang an sawihova, kar leh Thawhlehni July 25, Chawhma dar 11:00 khian state pumah an thlavang hauhna kawngzawh huaihawt ni se an ti a. Mizo mipuite thahnemngai taka kan unaute tawrhna hriatpuia thawk chhuak turin an sawm thu hriat a ni bawk.
Kawngzawh ni hian Mizoram chhunga In tinah puan dum zar theuh turin NGO Co-ordination Committee chuan a ngen a, sorkar hnathawk, zirlai, sumdawngte leh lirtheia ei zawngtute pawh kawngzawhnaah hian an hna tulte kalsana tel theuh turin NGO Co-Ordination Committee chuan a ngen bawk a.
Hetihlai hian Mizoram chhunga Meitei awm mekte an sa himna atan fimkhur turin NGO Co-Ordination Committee chuan a ngen bawk a ni.
