May ni 18-a ram pum hmun hrang hranga inkahna chhuakah military council sipai 83 an thih thu National Unity Government (NUG)-in thuchhuah an siam a.
Chu thuchhuah siama tarlan thi zat chu a hmuna thi tak tak aia a tlem zawk theih thu leh inkahna hmunah chuan chu aia sipai tam zawk an thih theih thu bakah ni khat chhunga hliam ringawt pawh sipai 35 an awm thu tarlan a ni.
Thuneihna laktu sipaihovin mipuite tharum hmanga rah beh leh tihhlum hna a thawk reng avangin mipui lamin mahni damkhaw chhuah nana lo inven theihna (rights) hmangin mipui defensive war chu beih mek a ni a.
Myanmar ram pumah mipuiten sipai thuneihna leh lal hrawtna chu Myanmar leilung ata tihtawp a, Federal democracy tun din theih nan ralmuang taka kawngzawhnate chu state leh region hrang hrangah kalpui mek a ni bawk.
Mipui kawngzawh lai beihna chu May ni 18-ah, ni khat lekah Mandalay region-ah vawi khat, Yangon region vawi 2, Sagaing region-ah vawi 11 a thlen thu thuchhuahah tarlan a ni a.
Chubakah People Defensive war thla 11 chhungin military council sipai 13000 chuang an thi tawh a, hliam pawh 4280 an awm tawh thu NUG sorkar hnuaia Defense Ministry department-in thuchhuah a siam a.
Chung thuchhuaha tarlante chu nikum 2021 June ni 1 atanga kumin April ni 25 thlenga record lak khawm atanga puan zar a ni a; mahse Myanmar ram puma inkahnaa sipai thi leh hliamte chanchin kimchang chu military council lamin puanzarna a nei ve lo thung a ni.
NUG sorkar din a nih atanga kum 1 chhungin mipui venghimtu pawl (PDF) battalion 257 din a ni thei tawh a, township based mipui venghimtu pawl (VDF) te pawh township 25-ah mumal taka din theih a nih thu hriat a ni a.
Chutih rualin Local PDF te, Urban Guerilla pawl 400 chuang chu awmze nei taka indona hmachhawn ho thei tura inrelbawl vek a nih tawh thu NUG chuan a thuchhuahah a tarlang bawk a ni.
