Military council hnena in register ve lo NLD Party 40 chuang te Military council hnuaia UEC ten March 28 chawhnu khan a hnawl thu an puang a.
Military council hnuaia Union Election Commission (UEC) chairman U Thein Soe chuan hming sign hnanin a hnawl thu hriat a ni.
Hun kal tawhah khan ram chhungah Party 91 a awm a, heng zinga party pakhat Military council ten an paihthlaksak tawh a, tuna Party 90 awm zingah Party 50 ten Military council hnenah an in register tawh thu hriat a ni.
Heng Party zingah Party thar 13 ten an register leh avangin Military council hnuaia Party in register zawng zawng Party 63 an ni tawh a ni.
Party in register ve lo Party 40 te hi March 29 atangin Military council ten an hnawl a. Heng Party an hnawl zingah hian NLD, SNLD, DPNS, ALD, Rakhine Party leh Party dang te an tel thu hriat a ni.
Heng Party an hnawl zingah SNLD(Kya Phyu Party) te an tel a, he Party hi Shan and Ethnic Democratic Party (Kya Phyu Party) tia hming thlakin an in register a ni.
Military council ten dan lova Party hrang hrang te an in register-tir thu leh phuahchawp UEC ten dan leh hrai chungchanga hma an laknaah ngaihpawimawh a nih loh thu San Chaung township-a NLD Party Vice chairman U Bo Bo Oo chuan March 16 khan Mizzima Media a hrilh tawh a ni.
Military council ten inthlanpui an buatsaihna turah rampum huapa Party chhuh thei 12, region leh state level-a Party chhuh thei 51 an awm thu an thuchhuahah an tarlang a ni.
Party pawl thar in register duh te tan, Military council election commission-ah a la in register thei zel a ni tiin an thuchhuahah an tarlang bawk a ni.
Military council ten January 26 khan ram chhunga Party inchuh tur thu an tlangzarh hnuah USDP, ANP, Military council ruat Minister Daw Thet Thet Khaing Party People's Pioneer Party, U Ko Ko Gyi Party People's Party, Dr. Aye Maung party AFP te pawh an in register thu hriat a ni bawk.
Military council kut hnuaia UEC ten an hnawl tak Party lian zingah NLD Party chairman Daw Aung San Suu Kyi leh a thawhpui nihna sang chelhtute Military council sipai ten an la hreng mek a ni.
