NUG sorkar hnuaia Defense Ministry chuan military council thunun Pyusawthi tel firfiak pawlte chungah hremna lekkawh a nih tur thu a puang chhuak.
Firfiak military council-in nitina a force kiam zel chhun khah nan Pyusawthi, firfiak pawl dinin, ralthuam leh sipai ralrel dan zirtirin mipui rapbetin an that a, khua an hal a, tharum thawhin, human rights an bawh chhia a, mipui an chawhbuai bakah mipui venghimtu pawl (PDF) leh mipui sipaite bei leta an chet thin thu NUG chuan thuchhuah a siam a.
NUG sorkar chuan chung firfiak leh rawlrawla che thin, sipai thlawptu pawl, khaw hal chhiat hmang, kum tling lo naupang sipaia tan luihtir leh hmeichhiate pawngsuala, mipat hmeichhiatna lama khaw lo takte chu Defense Ministery a enthlain, record a nei zel a, chung firfiak pawlte chunga hremna lekkawh a nih rualin a tuartu mipuite tan theih tawp chhuaha dikna hailansak leh an dikna chanvo pek let leh an nih tur thu a tarlang a.
National Unity Government hnuaia Defense Ministry chuan democracy ring tlattu, politics thlir dan inan loh vang, dinhmunin a zir loh avanga CDM zawm thei lote chu hreman pek emaw firfiak pawla telh emaw an nih dawn loh thu a sawi rualin, military council nena tharum thawhnaa inhnamhnawih leh thlawpte chu ngaihdam an ni dawn lova, dan ding lai ang leh sipai dan anga hremna pek an nih tur thu a sawi lang bawk a ni.
