National Unity Government (NUG) Pay application, Andriod bi katana hman tur thu June thla atanga hman theih a nih dawn thu NUG project, financial leh investment deputy Minister U Min Zyi Ya Oo chuan RFA a hrilh a.
Tuna mipuiin pawisa inthawn kualna Pay app an hman chi awlsam leh mawlmang taka hman theih chi a nih tur thu U Min Zyi Ya Oo chuan a sawi.
Ani chuan, “Pawi dah luh leh lak chhuah nana awlsam tak turin kan buaipui nasa hle a. NUG Pay hi technology thar hmanga siam a ni a, a him tawk a, revolution atan a tangkai hle dawn a, Myanmar ram chhunga sum vir vel atan pawh engemaw chen a tangkai ang. Hman vek turin ka sawm duh che u a ni,” tiin a sawi.
NUG sorkar-in kum khat hmel a hmuh hnuah a hmasa ber atan sum chet kualtirna application siam thu hi puan chhuah niin, he app hi nikum November thla atanga buaipui a ni tawh a. Android phone mai bakah IOS version pawha hman theih tura duan chho a nih tur thu hriat a ni.
Chu application hman tur chuan NUG Pay (agent) atangin code number chu Myanmar pawisa sing khat-a leiin a hman theih dawn a. Hman theih a nih atangin, Spring Lottery, Bond ang chi tanpuina program te chu NUG Pay kaltlang lei leh thawh theih a nih dawn ang bawkin, NUG Pay hmangtute inkarah pawisa inthawn leh dawn, thil lei nan pawha hman theih a ni dawn.
Tunah rih chuan Myanmar pawisa chauh hman theih tura ruahman a ni a, nakin lamah foreign currency hmanga pawisa inthawn leh lak chhuah theih tura ruahman a ni ang.
NUG hnuaia Department of Finance Ministry chuan thuneihna latu Min Aung Hlaia chenna In pakhat, Innyaa road-a awm zawrh leh Bond hralh chhuahna atangin US dollar maktaduai 42 chuang a hai luh tawh thu NUG hnuaia Project, Financial & Investment Minister U Tin Tun Naning chuan a sawi a ni.
