Magwe (Ma Gui) region, Pakokku township Kandaw khuaah Military council ten chenna in an hal chiam thu tualchhung mi ten Yangon Khit Media a hrilh.
Janaury 30 chawhnu dar 4:00 vel khan Military council ten Kandaw khua luh chilhin chennain an hal a, Kandaw hmar lam mel 2 vela hla Kanyet khuaah ralthuam lian an kah avangin mipui 1000 chuang an tlanchhiat thu hriat a ni.
“Khawchhungah in 1000 chuang an awm a. PDF te nen an inkah avangin tualchhung mipui 1000 chuang vel an tlanchhia a, Military council sipai erawh khawchhungah an la awm rih tih kan hria” tiin tualchhung mi pakhat chuan a sawi.
He tiang vek hian Sagaing region, Kyunhla (Chun Hlah) township, Taungtaseih (Tong Ya Seih) khuaah Military council sipai 120 rual, infantry regiment 368 leh Phyusawhti pawl ten luh chilhin In an hal nasa hle a. He operation-naah hian Kanbalu township, Magyikone (Ma Chi Kong) khua mi te an tlan chhuak nual a, chennan in an hal zat hriat chian a ni lo.
Military council sipai 120 rual, infantry regiment 368 leh Phyusawhti pawl ten kum 2022 December atangin kumin 2023 Janaury, thla 2 chhung khan Kanbalu township leh Kyunhla township-ah operation beiiin khaw 8-a chenna in 200 chuangah leh raltlante tawmna in 30 bakah Chek in 1000 chuang an hal chhia a, tualchhung mipui 13 an thah tawh thu Kyunhla active member te hnen atanga hriat a ni.
