Military council ten Martial Law an puanna hmun Thanintari (Ta Nin Ta Ri) region, Palaw township-a Palauk khawpui, Kyauklonegyi (Chauh Long Chi) Village tract, Alekone (A Le Kong) khuaah naupang kum 1 mi telin chhungkaw khata mi 7 an thah mang thu tualchhung mi te leh township Administration ten an sawi.
February 11 zan khan Alekone Military council ten an ruat Administrator U Aung Mynit leh a nupui, an fate leh tu te, kum 60 mi nutling 1, kum 42 mi nutling 1, kum 17 mi leh kum 16 mi mipa 2, kum 13 mi, kum 9 mi leh kum 1 mi naupang te thah an nih thu hriat a ni.
He chhiat tawhna chungchangah Military council ten an Instagram-ah Military council leader, USDP party, PDF ten an that tiin an tarlang thung a ni.
Palaw township NLD Party, Myeik (Meih) District Battalion 1, Palaw township PDF Daw San San Wai chuan, an thah tak te hi ruihhlo hmanga sumdawng mi te nen inhnamhnawiha ngaiin thah niin an sawi a. Hriat chian tumin kan ngeihven reng a, Myeik District-a Battalion te leh mi dang te kan zawt nasa hle a, a thattu te hi tu te pawl nge tih kan la hre chiang thei lo tiin a sawi.
“Keini pawhin hriat chian tumin kan ngaihven reng a. Keini PDF hi hmingchhe tura min puhna a ni. Chuvangin a thattu te hi hre chhuak ngei turin kan chhui mek a ni” tiin Daw San San chuan a sawi.
He chhiat tawhna chungchangah hian Thanintari District-a social media-ah Myeik district huam chhunga PDF ten engmah an tih loh chu an tarlang bawk a ni.
Heng chhungkua an thah mangna chungchangah BBC Media ten, tu te pawl thah nge tih nemnghehna an la nei lova. Tualchhung mi te leh a hnaivai mi te hnenah an chhui mek a ni.
Chhungkaw an thah mangna avangin Palauk khawchhungah Military council sipai te security an uluk hle a, an check nasat thu tualchhung mi te hnen atanga hriat a ni.
Palaw township-ah hetianga chhungkaw an thah mangna hi a vawi khat awmna a ni a. Southern Monitor ten an record dan chuan kum 2021 February thla atangin kumin 2023 January thla thlengin Thanintari region-ah tualchhung mi 360 chuang an boral tawh a, Palaw township-ah tualchhung mi 42 an boral tawh niin an sawi.
