Sagaing region, Pale township leh Myaing township inri-na M7 PDF camp pakhat Military council sipai ten Helicopter 3-a an beihnaah PDF sipai 7 an boral thu M7 PDF-a thuneitu pakhat chuan Yangon Khit Thit Media a hrilh a.
April 5 zing dar 9:00 vel khan Monywa (Mong Zua) khuaa Western Command atangin Mi 35 Helicopter pakhatin an bei a. Mi 17 ration phur Helicopter-in Military council sipai 80 an dah hnuah an bei zui leh a, PDF sipai 7 an boral a. Camp 2 an hal a, M4 pakhat, 9 MM pistol pakhat, 90 MM pakhat, tualchher bomb, tualchher sipai 6, Bike 4, Generator engine pakhat, Uniform leh Drone pakhat an hloh thu hriat a ni.
“Hektute an awm avangin camp min laksak a. Mi 35 Helicopter-a min beih tawh hnuah Military council sipai 80 leh 100 vel ten min hual a, kan sipaite an training zo an chaw ei laiin min bei zui a. A then an pumah leh an malah a fuh nual a, min dang chat tawp mai” tiin M7 PDF Battalion-a thuneitu pakhat chuan a sawi.
Khawmual lam atanga M7 PDF camp rawn bei te theih tawpa hmachhawn a ni a. Military council sipai ten chung lam Thlawhnain a rawn bomb a, ralthuam indaih loh avangin camp an chhuahsan thu hriat a ni.
Heng Military council sipaite hi division 99 hnuaia Bilu operation te an ni a. April 6 chawhnu dar 3:30 vel khan Mi 35 Helicopter pakhat leh Mi 17 Helicopter 2-in an thliar chhuah hnuah Myaing township, Nyaung khua NUG PDF camp an beih nawn thu hriat a ni bawk.
