Chin state, Paletwa township Yauh-Chaung-Wa khaw bulah Juen ni 27 kan Myanmar sipaite leh Arakan army (AA) te chu inkahna awm miah lovin, sipai lamah an inhrial sual avangin, amhni leh mahni an inkah vak thu AA lamin an sawi.
Myanmar sipaite chu June ni 27, chawhma lam dar 11 velah Yauh-Chaung-Wa khaw bulah anmahni leh mahni an inkap a, thi an awm nual theih thu AA thupuangtu Khaing Tuh Khah chuan Western News a hrilh a.
Ani chuan, “Inkahna chu a chhuak lo. Kan sipaite nena inkap pawh an ni lo. Myanmar sipaite chu anmahni leh anmahni an inkap a, sawi dawn chuan an hlauh luatah inhaiin, an inkap ta a ni. An inhai chhan ber pawh an hlauthawng lutuk chu an inhai a ni ber mai. Chuta kah hlum tawkte pawh an awm thu hriat a ni,” tiin a sawi.
Myanmar sipaite chu darkar chanve chuang inhaiin an inkap a, chu lai hmun chu Paletwa township Yauh-Chaung-Wa, Yauh-Wa khua leh Abountaa khaw bulah niin, chutianga an inkah tak vak avangin, Abountaa khaw mite chu hmun him lama an tlanchhiat thu tualchhung mi pakhatin Western News a hrilh a.
Ani chuan, “A tirah chuan silai puak ri kan hria a. Chu mi hnuah laipui a puak leh a. Military council sipaite leh AA te an inkap ta niin ka lo ring a. Mahse a ni lo. Military council sipaite anmahni leh anmahni an lo inkap zawk reng a ni,” tiin a sawi.
May ni 26-ah Abountaa khaw bulah military council sipaite leh Arakan sipaite chu darkar 2 vel zet an inkap a, Abountaa khaw lal leh in 10 lal te sipaitena an man a.
May ni 30 zing lam dar 10 velah pawh Abountaa khaw mi zawng zawng deuh thaw chu Suu-poh-taung tia koh chhak lam tlangah mana vuak an ni a, chu mi hnuah khaw mi thenkhat chu chhuahin, khaw mipui a zat ve ang vel chu sipai battalion 289 awmna tlangah hren zui an ni a. Khaw mi thenkhat chhuahte erawh chu an khuaah, sipaite an awm tlat avangin, awm ngam tawh lovin, hmun hmim zawk lam panin an raltlan thu hriat a ni.
